भोजपुरबाट सवारी ज्यान मुद्दाका फरार प्रतिवादी १९ बर्षपछि पक्राउ
धनकुटा,८ असार ।भोजपुरबाट सवारी ज्यान मुद्दाका फरार प्रतिवादी १९ बर्षपछि पक्राउ परेका छन् ।
पक्राउ पर्नेमा झापाको शिवसताक्षी नगरपालिका वडा नं. ६ डुँडामारी घर भएका ४३ वर्षीय मिलन भन्ने गजेन्द्रकुमार श्रेष्ठ रहेका छन् ।
श्रेष्ठलाई भोजपुरको ट्याम्केमैयुङ् गाउँपालिका ४ नागीमा लुकीछिपी बसिरहेको अवस्थामा आज पक्राउ गरी धनकुटा ल्याइएको जिल्ला प्रहरी कार्यालय धनकुटाका प्रवक्ता डीएसपी ओमप्रकाश खनालले बताए ।
चालक श्रेष्ठ गत २०७१ साल असोज २१ गते तत्कालीन डाँडाबजार गा.वि.स. वडा नं. २ फुस्रेमा भएको पिकअप दुर्घटनामा यात्रीको मृत्यु भएपछि फरार रहेका थिए ।
को.१ज.१५३९ नम्बरको पिकअपमा चढी डाँडाबजारबाट मोरङको पाटीगाउँतर्फ श्रीमतीसँगै जाँदै गरेका मोरङको तत्कालीन पाटीगाउँ गाविस वडा नम्बर २ का ३१ वर्षीय धनबहादुर मगर पिकअपबाट खसी घाइते भएपछि निजलाई उपचारको लागि डाँडाबजार स्वास्थ्य चौकी लगेकोमा उपचारको क्रममा केही समयमै निजको मृत्यु भएको थियो ।
दुर्घटना लगत्तै चालक श्रेष्ठ घटनास्थलबाटै फरार रहेका थिए । श्रेष्ठ उल्लेखित स्थानमा लुकीछिपी बसी ड्राइभिङ पेशा गर्ने गरेको सूचना प्राप्त भएपछि भोजपुर प्रहरीको सहयोगमा खोजतलास गरी निजलाई पक्राउ गरिएको हो ।
यसअघि निज आफ्नो वास्तविक पहिचान ढाँटी स्थान परिवर्तन गर्दै प्रहरीसँग लुकीछिपी बस्ने गरेको प्रारम्भिक अनुसन्धानबाट खुलेको छ ।
पक्राउ परेकालाई धनकुटा जिल्ला अदालतबाट थुनामा राख्ने म्याद लिई सवारी ज्यान मुद्दामा थप अनुसन्धान गरिने डीएसपी खनालले बताए ।
