चौबिसे गाउँपालिकाको गाउँ सभा शुरु
नारायण कुमार राई/धनकुटा,११ असार । चौबिसे गाउँपालिकाको १७ औ गाउँ सभा २१ करोड बराबरको पूँजिगत बजेट प्रस्ताव गर्दै मंगलबारबाट शुरु भएको छ ।
सभाले पालिकाले आर्थिक तथा न्यायीक समितिको प्रतिबेदन पारित गरेको भने बजेटलाई पुर्णता दिन गाउँसभाको अर्को बैठक असार २३ गते सम्मका लागि सारेको छ ।
पालिकाका अध्यक्ष राजकुमार लिम्बु(चेम्जोङ) को अध्यक्षतामा भएको गाउँसभामा पालिकाका उपाध्यक्ष टंकमायाँ पाङ्मी मगरले आगामी आर्थिक बर्षका लागि नीति तथा कार्यक्रम सार्वजनिक गर्नुभएको थियो ।
पालिकाले आगमी बर्षको कार्यक्रममा शिक्षा क्षेत्रको कार्यक्रमलाई बिशेष प्राथमिकतामा राखेको छ । त्यस्तै कृषि र पशुपालन कार्यक्रम र गत बर्षको अधुरा आयोजनाहरुलाई सम्पन्न गर्ने कार्यक्रमलाई निरन्तरता दिएको छ ।
त्यस्तै वडा नं. २ का अध्यक्ष तथा पालिका सदस्य एनोज तुम्साले पालिकाको आर्थिक ऐन २०७५ लाई संशोधन गर्न बनेको बिद्येयक २०८२ र पालिका सदस्य छलमायां राईले न्यायीक समितिको प्रतिबेदन निर्णयका लागि सभामा पेश गर्नुभएको थियो ।
प्रस्ताबित दुबै बिषय सभाबाट पारित भएपछि पालिकाका उपाध्यक्ष मगरले सभामा बित्तिय समानिकरण(संघ र केन्द्र),राजश्व बाँडफाँड(संघ र प्रदेश),आन्तरिक आय र गत बर्षको अल्यालाई आय मानेर २१ करोड १६ लाख ९१ ह्जार बराबरको बजेट पेश गर्नुभएको थियो ।
आगामी बजेट निर्माणका लागि पालिकाको ११ वटा बिषयगत शाखा र ८ वडाबाट २६ करोड ७७ लाख २९ हजार ५ सय बराबरको योजना माग गरिएको छ ।
बजेटका बिषयमा आगामी असार २३ गते पालिकाको दोस्रो बैठकमा आबस्यक छलफल गरेर बजेट पारित गर्ने कार्यक्रम रहेको पालिकाका प्रमुख प्रशासकीय अधिकृत तथा गाउँसभा सचिव पशुराम दाहालले जानकारी दिनुभयो ।
