सांगुरीगढीको ठलुङ्टार पर्यटकिय क्षेत्रमा सरसफाई
हिराराज राई,धनकुटा । धनकुटाको साँगुरीगढी गाउँपालिका–८ मा रहेको सृजनशील युवा क्लबले स्थानीय पूर्वाधार सुधार र सरसफाइलाई लक्षित गर्दै “श्रमदान अभियान २०८२” सञ्चालनमा ल्याएको छ। क्लबका अध्यक्ष तिकाराम राईको नेतृत्वमा हरेक शुक्रबार श्रमदान अभियान सुरु गरिएको हो।
असार २७ गते शुक्रबार ठलुङ्टार पर्यटकीय क्षेत्र र वरपरको बाटो सरसफाइ गरिएको क्लबले जनाएको छ। अभियान अन्तर्गत बिग्रिएको र भत्किएको बाटो सुधार गर्दै सुरक्षित र सहज आवागमनको व्यवस्था मिलाइएको अध्यक्ष राईले जानकारी दिए।
“युवा एकता हाम्रो जोड, लागुऔषध दुर्व्यसनी, नारी हिंसा छोड्” भन्ने मूल नाराका साथ सुरु गरिएको अभियानलाई निरन्तरता दिइने क्लबले जनाएको छ।
आगामी शुक्रबार खुँडीस्थित श्री लक्ष्मी माध्यमिक विद्यालयको कम्पाउन्ड सरसफाइदेखि मदनचोकसम्मको बाटो सरसफाइ गरिने कार्यक्रम रहेको अध्यक्ष राईले बताए।
उनका अनुसार अभियानले स्थानीय पर्यटन प्रवर्द्धन, पूर्वाधार विकास र समुदायमा सामाजिक चेतना फैलाउन सहयोग पुर्याउने विश्वास लिएको छ।
