एक मुठी श्वास रहुन्जेलसम्म आमरण अनशन जारी रहन्छ : मेयर भट्टराई
काठमाडौ । दिक्तेल रुपाकोट मझुवागढी नगरपालिकाका मेयर तीर्थराज भट्टराईले आफ्नो आमरण अनसन जारी रहेको बताएका छन् ।
भट्टराईले बाँदर आतङ्क नियन्त्रण, जलवायु परिवर्तन र बाँसको सदुपयोगसम्बन्धी ७ बुँदे मागसहितको आमरण अनशन जारी राखेका हुन्।भट्टराईको तर्फबाट उपमेयर विसन राईले एक प्रेस विज्ञप्ति जारी गर्दै मेयर भट्टराईले आफ्नो माग सम्बोधन नभएसम्म अनशन नतोड्ने जानकारी दिएका हुन्।
मेयर भट्टराईले श्रावण ११ गतेदेखि काठमाडौँको माइतीघर मण्डलामा सत्याग्रह सुरु गरेका थिए। श्रावण १४ गते स्वास्थ्यमा समस्या आएपछि उनलाई वीर अस्पताल लगिएको थियो । अस्पतालमा भर्ना भएपछि राष्ट्रिय मानव अधिकार आयोगले उनको जीवन रक्षाका लागि सरकारलाई ध्यानाकर्षण गराएको थियो।
यसैबिच, उप(प्रधान तथा सहरी विकास मन्त्री प्रकाशमान सिंह र स्वास्थ्य तथा जनसंख्या मन्त्री प्रदीप पौडेलको पहलमा वन तथा वातावरण मन्त्रालयमा वार्ता भएको थियो। नगर उपप्रमुख विसन राईको नेतृत्वमा गएको टोली र मन्त्रालयबिच ५ घण्टा लामो छलफल भए पनि कुनै ठोस निष्कर्ष निस्केको छैन।
