झापामा गोठमा आगलागी हुँदा खसी–बाख्रा मरे, निभाउने क्रममा वृद्धासहित २ जना घाइते
झापा । झापाको अर्जुनधारा नगरपालिका–१० चोथाइमा शुक्रबार राति गोठीमा आगलागी हुँदा १० वटा खसी–बाख्रा जलेर मरेका छन् ।
वृद्धासहित २ जना घाइते भएका छन् ।स्थानीय बलबहादुर दाहालको गोठमा राति ११ः३० बजेतिर आगलागी भएको प्रहरीले जनाएको छ । आगोले जलेर १० वटा खसी–बाख्रा र ५० वटा ब्रोइलर कुखुरा मरेका छन् भने गोठ पूर्णरूपले ध्वस्त भएको छ ।
घटनामा १३ लाख २५ हजार रूपैयाँभन्दा बढीको क्षति भएको प्रहरीको प्रारम्भिक अनुसन्धानबाट खुलेको छ । आगो निभाउने क्रममा घरधनीकी श्रीमती ४२ वर्षीया छत्रकुमारी थापा र घरमा बस्दै आएकी ७० वर्षीया भीमादेवी भण्डारी घाइते भएका छन् ।
छत्रकुमारी आगोले पोलेर र भीमादेवी लडेर घाइते भएको झापा प्रहरीका प्रवक्ता डीएसपी खगेन्द्रबहादुर खड्काले बताए । उनका अनुसार सामान्य अवस्थामा दुवै जना शनिश्चरेस्थित शंकर अस्पतालमा उपचारपछि घर फर्किएका छन् ।
बिर्तामोड तथा मेचीनगर नगरपालिकाको दमकल, स्थानीय र प्रहरीको सहयोगमा करिब २ घण्टापछि आगो नियन्त्रणमा लिइएको थियो । घटनाको कारण खुल्न नसकेको र थप अनुसन्धान भइरहेको डीएसपी खड्काले बताए ।
विद्युत सर्ट भएर आगलागी भएको हुनसक्ने प्रहरीको प्रारम्भिक अनुमान छ ।
