झापाको अर्जुनधारामा आगलागी
झापा । झापाको अर्जुनधारा–१० कालिझोडामा गएराति भएको भीषण आगलागीले करिब आठ लाख ८७ हजार रुपैयाँ बराबरको क्षति पुगेको छ।
मछिन्द्र पौडेलको जस्ता र काठले बनेको दुईतले ग्वाली घरमा गए राति करिब ११:४५ बजे अचानक आगो लागेको थियो। आगलागीबाट ग्वाली घर पूर्णरूपमा नष्ट हुनुका साथै घरभित्र भण्डारण गरिएका सामग्रीहरू जलेर नष्ट भएका छन्।
प्राप्त विवरण अनुसार चामल ५० बोरा (१५०० केजी), चोकर १० बोरा (५०० केजी), खुदी १० बोरा (५०० केजी), धान २० मन (८०० केजी), मुडा बुन्ने धागो/डोरी ४० बोरा र करिब ५ कठ्ठा पराल जलेपछि करिब ८ लाख ८७ हजार रुपैयाँ बराबरको क्षति भएको अनुमान गरिएको छ।
आगलागी नियन्त्रणका लागि नेपाल प्रहरी, स्थानीयबासी, बिर्तामोड नगरपालिका र मेचीनगर नगरपालिकाको दमकल परिचालन गरिएको थियो।
सबैको संयुक्त प्रयासमा आगो राति १:१० बजे पूर्ण रूपमा नियन्त्रणमा आएको जनाइएको छ।
