कोशीको ५ जिल्लामा एमाले महाधिवेशन प्रतिनिधि सर्वसम्मत
विराटनगर । नेकपा एमालेको ११ औं केन्द्रीय महाधिवेशनका लागि कोशी प्रदेशको ५ जिल्लामा सर्वसम्मत प्रतिनिधि छनाेट भएका छन् ।
एमाले कोशी प्रदेश अध्यक्ष घनश्याम खतिवडाका अनुसार कोशी प्रदेशको भोजपुर,ताप्लेजुङ, इलाम, पाँचथर र सोलुखुम्बुमा सर्वसम्मत रुपमा महाधिवेशन प्रतिनिधि छानिएका हुन् ।तेह्रथुम र खोटाङ जिल्लमा सहमतिमा लागि मतदानको प्रकृया रोकिएको छ । धनकुटामा प्रतिनिधि छनोटका लागि मतदानका क्रममा विवाद भएको उनले बताए ।
अध्यक्ष खतिवडाका अनुसार झापा, मोरङ, सुनसरी,उदयपुर र ओखलढुंगामा मतदान भएको छ । प्रतिनिधि छनोटका लागि मतदान भएका स्थानहरूको मतपेटिका संकलन गरी आजबाटै मतगणना सुरू हुने अध्यक्ष खतिवडाले जानकारी दिए ।उनका अनुसार कोशी प्रदेशबाट २२९ जना महाधिवेशन प्रतिनिधि छानिनेछन् ।
प्रतिनिधि सर्वसम्मत छनोट भएको स्थानमा दुवै पक्षले भागवण्डा गरेका थिए । निर्वाचन भएको स्थानमा केपी शर्मा ओली पक्ष र इश्वर पोखरेल पक्षले समूह बनाएर प्रतिस्पर्धा गरेका छन् ।
