झापाको गौरादहमा आगलागी
झापा । झापा जिल्लाको गौरादह नगरपालिका–३, गुराँसचोकमा धानको परालमा आगलागी भएको छ।
गत पौष २० गते अन्दाजी राति १०:३० बजेको समयमा सोही स्थान निवासी काजी पौडेलको घर नजिक राखिएको करिब २.५ बिघा क्षेत्रफलको धानको परालमा के–कुन कारणले अचानक आगो लागेको हो।
आगलागी भएको खबर प्राप्त हुनासाथ प्रहरी, स्थानीय बासिन्दा तथा दमक नगरपालिका र कमल गाउँपालिकाका दमकलको संयुक्त प्रयासमा आगो नियन्त्रणमा लिइएको थियो। करिब राति ११:५० बजेको समयमा आगो पूर्ण रूपमा नियन्त्रणमा आएको प्रहरीले जनाएको छ।
उक्त आगलागीबाट कुनै मानवीय तथा चौपाया क्षति नभएको भए पनि धानको पराल पूर्ण रूपमा जलेर नष्ट भएको छ। आगलागीबाट करिब १० हजार रुपैयाँ बराबरको क्षति भएको प्रारम्भिक अनुमान गरिएको छ। आगलागीको कारणबारे थप अनुसन्धान भइरहेको प्रहरीले जनाएको छ।
