लेटाङमा तामाङ जातिको परम्परागत बाजा बजाउने तालिम सुरु
लेटाङ, २४ पुस । लेटाङ नगरपालिकाको आयोजनामा आदिवासी जनजातिहरूको सीपमूलक कार्यक्रम अन्तर्गत तामाङ जातिको परम्परागत बाजा बजाउने तालिम सुरु गरिएको छ।
पौष २३ गते बुधबारदेखि सुरु भएको ७ दिने तालिममा तामाङ समुदायका २० जना प्रशिक्षार्थी सहभागी भएका छन् ।
उनीहरूलाई तामाङ समुदायको परम्परागत बाजा टुङ्ना र डम्फु बजाउने व्यवहारिक प्रशिक्षण प्रशिक्षक पदम लामाले दिइरहनु भएको छ।
तामाङ जातिको तालिम सम्पन्न भएपछि ७ दिन नै नेवार जातिको परम्परागत बाजा बजाउने तालिम सञ्चालन गरिने नगरपालिकाले जनाएको छ।
तालिमको उद्घाटन लेटाङ नगरपालिकाकी शाखा अधिकृत सुष्मा कोइरालाले गर्नुभयो । कार्यक्रममा बोल्दै उहाँले आदिवासी जनजातिको मौलिक संस्कृति संरक्षण र सीप विकासमा यस्ता सीपमूलक तालिमको महत्व रहेको बताउनुभयो।
स्थानीय स्तरमै आयोजना गरिएको यस तालिमले आदिवासी जनजातिको परम्परागत बाजा संरक्षण, प्रवर्द्धन तथा नयाँ पुस्तामा हस्तान्तरण गर्न सहयोग पुग्ने अपेक्षा गरिएको छ।-लेटांग खबर
