विराटनगरबाट श्रोत नखुलेको नगद सहित एक जना पक्राउ
विराटनगर । विराटनगरबाट श्रोत नखुलेको नगद सहित एक जना पक्राउ परेका छन् ।
पक्राउ पर्नेमा भारत बिहार राज्य अररिया जिल्ला फारबिसगन्ज बस्ने बर्ष ५५ को नन्दलाल बाहेती रहेका छन् ।
आज दिउंसो विराटनगर १७ मटेरुवा स्थित सडकमा अस्थायी प्रहरी पोष्ट, मटेरुवाबाट खटिएको प्रहरी टोलीले जोगबनीबाट विराटनगरतर्फ आउदै गरेको BR 38AA8306 नं. को स्कुटरलाई रोकी चेकजाँच गर्दा स्कुटर चालक बाहेतीले शरिरभित्र विभिन्न भागमा लुकाई छिपाई राखेको श्रोत नखुलेको नेपाली नगद रु. १००० दरको ३०० थान, रु. ५०० दरको ४ थान, रु. १०० दरको ११ थान गरी जम्मा नेपाली रु. ३,०३,१००/- (तीन लाख तिन हजार एक सय ) रकम फेला पारेपछि नियन्त्रणमा लिइएको जिल्ला प्रहरी कार्यालय मोरंगले जनाएको छ ।
बाहेतीलाई रकम र स्कुटी सहित नियन्त्रणमा लिई इलाका प्रहरी कार्यालय, रानीमा ल्याई थप अनुसन्धान कार्य भइरहेको प्रहरीले जनाएको छ ।
