धनकुटाको साँगुरीगढी–७ गोलखाडीमा श्रम संस्कृति पार्टीको समिति गठन
हिराराज राई,धनकुटा । धनकुटा जिल्लाको साँगुरीगढी गाउँपालिका वडा नं. ७ गोलखाडीमा पौष २९ गते मंगलवार श्रम संस्कृति पार्टीको समिति गठन गरिएको छ। स्थानीय राजनीतिक सक्रियता बढ्दो क्रममा रहेको यस क्षेत्रमा पार्टी संगठन विस्तारको उद्देश्यसहित समिति गठन गरिएको हो।
सुनसरीको धरान उपमहानगरपालिकाका नगर प्रमुख तथा श्रम संस्कृति पार्टीका अध्यक्ष हर्कराज राई (हर्क साम्पाङ) को विशेष उपस्थितिमा कार्यक्रम सम्पन्न भएको थियो। कार्यक्रममा साँगुरीगढी गाउँपालिका वडा नं. ६, ७ र ८ का स्थानीयहरूको सहभागिता रहेको थियो।
समिति गठन कार्यक्रममा बोल्दै नगर प्रमुख साम्पाङले श्रम, इमान्दारिता र आत्मनिर्भरतालाई राजनीतिक संस्कृतिको मूल आधार बनाउनुपर्नेमा जोड दिनुभयो। उहाँले भन्नुभयो, “हाम्रो चुनाव चिन्ह माटो हो। माटो भनेको श्रम, जीवन र पहिचान हो। सबै दाजुभाइ तथा दिदीबहिनीहरू माटोमा मिलेर भोट हालौँ, देश विकासमा अघि बढौँ।”
उहाँले परम्परागत राजनीतिबाट फरक ढंगले श्रमलाई सम्मान गर्ने राजनीतिक अभ्यास आवश्यक रहेको उल्लेख गर्दै स्थानीय तहबाटै विकासको नयाँ मोडेल निर्माण गर्न सकिने बताउनुभयो। श्रम संस्कृति पार्टी श्रमिक, किसान, युवाहरू र उत्पादनशील वर्गको हकहितका लागि राजनीति गर्ने उद्देश्यसहित अघि बढिरहेको उहाँको भनाइ थियो।
कार्यक्रममा सहभागी स्थानीयहरूले श्रम र इमान्दारीतामा आधारित राजनीति अहिलेको आवश्यकता भएको बताउँदै पार्टीको अभियानलाई गाउँस्तरमै सफल बनाउने प्रतिबद्धता व्यक्त गरेका थिए।
