मोरङको लेटाङ स्थित समला पुग्ने सडक ढिलाइ हुँदा पर्यटकलाई सास्ती
मोरङ । मोरङको लेटाङ नगरपालिका वडा नं. ७ मा अवस्थित समला क्षेत्र पछिल्लो समय महत्वपूर्ण पर्यटकीय गन्तव्यका रूपमा चिनिँदै गएको छ । प्राकृतिक सौन्दर्य, शान्त वातावरण र सम्भावनाका कारण यहाँ आन्तरिक पर्यटकको आकर्षण बढ्दै गएको छ ।
समलामा पुग्न लेटाङ र जाँते दुवै स्थानबाट सडक पहुँच भए पनि हाल निर्माणाधीन कालोपत्रे सडक अत्यन्तै ढिलाइका साथ अगाडि बढिरहेका छन् । लेटाङ–समला र जाँते–समला दुवै सडक समयमै सम्पन्न नहुँदा पर्यटकहरूलाई आवागमनमा समस्या भइरहेको स्थानीयको गुनासो छ ।
पर्यटन प्रवर्द्धनका लागि सडक पूर्वाधार नै प्रमुख आधार भएकाले सम्बन्धित निकायले निर्माण कार्यलाई तीव्रता दिँदै छिटो निकास दिनुपर्ने आवश्यकता देखिएको छ । समयमै सडक सम्पन्न भए समला क्षेत्रको पर्यटन विकासले थप गति लिने अपेक्षा गरिएको छ ।
