आगामी आर्थिक वर्षका लागि २१ खर्ब २४ अर्ब ३४ करोडको बजेट सार्वजनिक
काठमाडौं । सरकारले आगामी आर्थिक वर्षका लागि २१ खर्ब २४ अर्ब ३४ करोड रुपैयाँ बराबरको वार्षिक बजेट सार्वजनिक गरेको छ । संघीय संसद्को संयुक्त बैठकमा आगामी आर्थिक वर्षको आयव्ययको अनुमानित विवरण प्रस्तुत गर्दै अर्थमन्त्री डा. स्वर्णिम वाग्लेले उक्त आकारको बजेट घोषणा गर्नुभएको हो । बजेटमा सरकारले साधारण खर्च, विकास निर्माण र वित्तीय व्यवस्थापनलाई सन्तुलित रूपमा अघि बढाउने लक्ष्य राखेको छ ।
अर्थमन्त्री डा. वाग्लेले प्रस्तुत गर्नुभएको बजेट अनुसार कुल विनियोजनमध्ये चालुतर्फ सबैभन्दा ठूलो हिस्सा अर्थात् १२ खर्ब ७० अर्ब रुपैयाँ छुट्ट्याइएको छ । देशको पूर्वाधार तथा विकास निर्माणका कार्यका लागि पूँजीगततर्फ ४ खर्ब ३१ अर्ब रुपैयाँ विनियोजन गरिएको छ भने वित्तीय व्यवस्थातर्फ ४ खर्ब २२ अर्ब रुपैयाँ कायम गरिएको छ ।
आगामी आर्थिक वर्षको खर्च बेहोर्ने स्रोततर्फ सरकारले आन्तरिक राजस्व संकलनलाई नै मुख्य आधार बनाएको छ । आगामी वर्ष कुल १४ खर्ब ४ अर्ब रुपैयाँ राजस्व परिचालन गरिने अर्थमन्त्री वाग्लेले जानकारी दिनुभयो । त्यसैगरी, नपुग स्रोत परिपूर्तिका लागि वैदेशिक अनुदानतर्फ ६१ अर्ब ७४ करोड रुपैयाँ प्राप्त हुने अनुमान सरकारले गरेको छ ।
राजस्व र अनुदानबाट समेत बजेटको कुल खर्च धान्न नसकिने भएपछि बाँकी रकम ऋणमार्फत पूर्ति गर्ने रणनीति सरकारले लिएको छ ।
जसअनुसार आन्तरिक ऋणतर्फ ४ खर्ब १० अर्ब रुपैयाँ र वैदेशिक ऋणतर्फ २ खर्ब ४७ अर्ब रुपैयाँ परिचालन गरिने बजेट वक्तव्यमा उल्लेख छ । बजेट सार्वजनिक गर्दै अर्थमन्त्री डा. वाग्लेले आन्तरिक उत्पादन वृद्धि, रोजगारी सिर्जना र आर्थिक स्थायित्वलाई केन्द्रमा राखेर स्रोतको बाँडफाँट गरिएको दाबी गर्नुभएको छ ।
