सेबोनले सार्वजनिक गर्यो मार्जिन लेन्डिङ र सर्ट सेलिङ कार्यान्वयनको अवधारणापत्र
काठमाडौं, १५ साउन । नेपाल धितोपत्र बोर्ड (सेबोन)ले पुँजीबजारमा आधुनिक वित्तीय उपकरण लागू गर्ने तयारीलाई अघि बढाउँदै मार्जिन लेन्डिङ, सेक्युरिटिज लेन्डिङ एन्ड बरोइङ (क्ीद्य) तथा सर्ट सेलिङसम्बन्धी कन्सल्टेसन पेपर सार्वजनिक गरेको छ। यी व्यवस्था कार्यान्वयनका लागि आवश्यक कानुनी, नीतिगत, संस्थागत तथा प्राविधिक पक्षबारे सुझाव संकलन गर्ने उद्देश्यले बोर्डले पहिलोपटक अवधारणापत्र सार्वजनिक गरेको हो।
सेबोनका अनुसार प्रस्तावित व्यवस्थाले नेपालको पुँजीबजारलाई थप परिपक्व, प्रतिस्पर्धी र अन्तर्राष्ट्रिय अभ्यासअनुकूल बनाउने अपेक्षा गरिएको छ। यसका लागि आवश्यक कानुनी संशोधन, बजार पूर्वाधार, जोखिम व्यवस्थापन प्रणाली तथा कारोबार प्रक्रियासम्बन्धी विषयलाई अवधारणापत्रमा समेटिएको छ।
सरकारले चालु आर्थिक वर्ष २०८३÷८४ को बजेटमार्फत इन्ट्राडे कारोबार, सर्ट सेलिङ र डेरिभेटिभजस्ता नयाँ वित्तीय उपकरण चरणबद्ध रूपमा सञ्चालनमा ल्याउने घोषणा गरेको थियो। सोही घोषणालाई कार्यान्वयन गर्ने क्रममा सेबोनले आफ्नो वार्षिक पुँजीबजार नीति तथा कार्यक्रममा पनि मार्जिन लेन्डिङ, सेक्युरिटिज लेन्डिङ एन्ड बरोइङ तथा सर्ट सेलिङ सञ्चालनका लागि आवश्यक कानुनी, संस्थागत र प्रक्रियागत संरचना विकास गर्ने योजना समावेश गरेको छ।
बोर्डले कन्सल्टेसन पेपरमार्फत सरोकारवाला निकाय तथा विज्ञबाट सुझाव संकलन गरी आवश्यक परिमार्जनपछि यी उपकरण कार्यान्वयनको प्रक्रिया अगाडि बढाउने जनाएको छ।
