पर्बत समाज यूएईद्वारा ‘तिज धमाका २०२६’ आयोजना गरिने
सचिन्द्र श्रेष्ठ,दुबई । नेपाली महिलाहरूको महान् पर्व हरितालिका तिजको अवसरमा पर्बत समाज यूएईले आगामी ३० अगस्ट २०२६ (आइतबार) बरदुबईस्थित याक एण्ड यति क्लब एभरेष्टमा ‘तिज धमाका २०२६’ आयोजना गर्ने भएको छ।
नेपाली कला, संस्कृति तथा मौलिक लोकसंगीतको संरक्षण र प्रवर्द्धन गर्ने उद्देश्यले आयोजना गरिएको कार्यक्रममा नेपालका चर्चित लोकगायक श्याम राना, चर्चित लोकगायिका सुष्मिता क्षेत्रीलगायत यूएईमा रहेका स्थानीय कलाकारहरूको आकर्षक सांगीतिक तथा सांस्कृतिक प्रस्तुति रहने आयोजकले जनाएको छ।
कार्यक्रममा सहभागीहरूका लागि परम्परागत तिजको दरसहित विभिन्न नेपाली परिकारको विशेष व्यवस्था गरिएको छ।
प्रवासी नेपाली समुदायबीच आपसी एकता, सद्भाव र सांस्कृतिक पहिचानलाई थप सुदृढ बनाउने उद्देश्यका साथ आयोजना गरिएको कार्यक्रममा यूएईमा रहेका सम्पूर्ण नेपाली दाजुभाइ तथा दिदीबहिनीलाई परिवारसहित सहभागी भई कार्यक्रमलाई सफल बनाउन पर्बत समाज यूएईले आग्रह गरेको छ।
आयोजकका अनुसार कार्यक्रममा सहभागी हुने दर्शकमध्ये एक जना भाग्यशाली विजेतालाई सुनको तिलहरी विशेष उपहारका रूपमा प्रदान गरिनेछ।
