पहिरो खस्दा सिद्धार्थ राजमार्ग पूर्णरुपमा अवरुद्ध
पाल्पा । पाल्पाको तिनाउ गाउँपालिका–३ स्थित सिद्धबाबा सुरुङमार्गको पाल्पातर्फको प्रवेश बिन्दुभन्दा करिब १०० मिटर उत्तरतर्फ पहिरो खस्दा सिद्धार्थ राजमार्ग पूर्णरूपमा अवरुद्ध भएको छ।
माथिबाट निरन्तर पहिरो खसिरहेको हुँदा सडक खुलाउन तत्काल काम सुरु गर्न सकिएको छैन। पहिरोका कारण राजमार्गमा सवारी आवागमन पूर्ण रूपमा रोकिएको प्रहरीले जनाएको छ।
घटनास्थलमा प्रहरी चौकी दोभानबाट प्रहरी सहायक निरीक्षकको कमाण्डमा ट्राफिक प्रहरीसहित ५ जनाको टोली खटिएको छ। टोलीले घटनास्थलको सुरक्षा व्यवस्थापन गर्दै सडक खुलाउने पहल गरिरहेको छ।
पहिरो हटाउन जेसीबी तयारी अवस्थामा राखिएको छ। पहिरो खस्न रोकिएलगत्तै सडक खुलाउने काम सुरु गरिने प्रहरीले जनाएको छ।
उक्त स्थान प्रहरी चौकी दोभानबाट करिब १ किलोमिटर दक्षिणतर्फ पर्छ। सडक अवरुद्ध भएपछि यात्रु तथा सवारी चालकलाई वैकल्पिक व्यवस्था अपनाउन र पहिरो प्रभावित क्षेत्रमा सावधानी अपनाउन आग्रह गरिएको छ।
