यात्रुबाहक ईभीले स्कुटरलाई ठक्कर दिँदा एक महिलाको मृत्यु, एक जना घाइते
दाङ । राप्ती गाउँपालिका–१ माथिल्लो भालुवाङस्थित पेट्रोल पम्प नजिक यात्रुबाहक ईभी गाडीले स्कुटरलाई ठक्कर दिँदा एक जनाको मृत्यु भएको छ भने एक जना घाइते भएका छन्।
भालुवाङबाट प्युठानतर्फ जाँदै गरेको लु.प्र.०२–००१ ज ०१०८ नम्बरको ईभी गाडीले लापेबाट भालुवाङतर्फ आउँदै गरेको रा.४ प ५८३६ नम्बरको स्कुटरलाई ठक्कर दिएको हो।
प्रहरीका अनुसार ईभी गाडी प्युठानको स्वर्गद्वारी नगरपालिका–२ का २२ वर्षीय लक्ष्मण पुनले चलाएका थिए भने स्कुटर अर्घाखाँचीको शितगंगा नगरपालिका–८ लापेका २० वर्षीय अभिषेक कुमालले चलाएका थिए।
दुर्घटनामा स्कुटरको पछाडि सवार शितगंगा–८ लापेकी ३२ वर्षीया सम्झना केसी गम्भीर घाइते भएकी थिइन्। उनलाई उपचारका लागि भालुवाङ अस्पताल लगिएकोमा उपचारका क्रममा चिकित्सकले मृत घोषणा गरेका हुन्।
स्कुटर चालक अभिषेक कुमाल घाइते भएका छन्। उनको अवस्थाबारे थप विवरण खुल्न बाँकी रहेको छ।
दुर्घटनामा संलग्न ईभी गाडी र स्कुटर तथा ईभी चालकलाई प्रहरीले नियन्त्रणमा लिएर घटनाबारे थप अनुसन्धान गरिरहेको जनाएको छ।
