फेसबुकमा भरुवा बन्दुकको फोटो पोस्ट गर्ने र लाइसेन्सबिनाको बन्दुक राख्ने दुई जना पक्राउ
गोरखा । गोरखाको सिरानचोक गाउँपालिका–६ नयाँसाँघुबाट प्रहरीले फेसबुकमा भरुवा बन्दुक बोकेको फोटो पोस्ट गर्ने एक जना र लाइसेन्सबिनाको भरुवा बन्दुक राख्ने अर्का एक जनालाई पक्राउ गरेको छ।
पक्राउ पर्नेमा भीमसेन थापा गाउँपालिका–२ सुनार गाउँ घर भई हाल पालुङटार नगरपालिका–१ खोप्लाङमा ज्यामी काम गर्दै आएका ४३ वर्षीय प्रेम सुनार र सोही स्थानका ३३ वर्षीय विष्णु सुनार रहेका छन्।
प्रेम सुनारले आफ्नो ‘Prem Sunar’ नामक फेसबुक आईडीमार्फत भरुवा बन्दुक बोकेको फोटो पोस्ट गरेपछि प्रहरीले अनुसन्धान अघि बढाएको थियो। सो क्रममा उनलाई लाइसेन्स नभएको एक थान भरुवा बन्दुकसहित नियन्त्रणमा लिइएको हो।
प्रहरीले अनुसन्धान गर्ने क्रममा बरामद भएको भरुवा बन्दुक पालुङटार नगरपालिका–१ खोप्लाङ बस्ने विष्णु सुनारको रहेको खुलेपछि उनलाई पनि पक्राउ गरिएको जनाएको छ।
घटनाबारे थप अनुसन्धान भइरहेको प्रहरीले जनाएको छ।
