कोशीका मुख्यमन्त्री कार्कीले आज विश्वासको मत लिँदै
विराटनगर । कोशी प्रदेशका मुख्यमन्त्री हिक्मतकुमार कार्कीले आज प्रदेश सभाबाट विश्वासको मत लिने भएका छन्।
प्रदेश सभा सचिव सुदर्शन खड्काका अनुसार सोमबार दिउँसो २ बजे बस्ने प्रदेश सभा बैठकमा मुख्यमन्त्री कार्कीले विश्वासको मत लिने कार्यसूची रहेको छ।
नेपाली कांग्रेस कोशी प्रदेश संसदीय दलको भदौ ३ गते बसेको बैठकले प्रदेश सरकारलाई दिएको समर्थन फिर्ता लिने निर्णय गरेपछि मुख्यमन्त्री कार्कीले विश्वासको मत लिन लागेका हुन्।
कांग्रेससँगको सहकार्य टुटेपछि अहिले कोशी प्रदेशमा नेकपा एमाले र नेपाली कम्युनिस्ट पार्टी (नेकपा)को सरकार रहेको छ। नेकपासँग नयाँ सहमति भएपछि मुख्यमन्त्री कार्कीले सरकार पुनर्गठन गर्दै नेकपाका चार जना प्रदेश सभा सदस्यलाई सोमबार मन्त्री पदको शपथ गराइसकेका छन्।
मुख्यमन्त्री कार्कीले आज विश्वासको मत पाएमा नयाँ सत्ता समीकरणअनुसार सरकार सञ्चालनको बाटो थप स्पष्ट हुनेछ।
