धनकुटामा लागूऔषध सहित २१ वर्षीय युवक पक्राउ
धनकुटा । धनकुटाको शहीदभूमि गाउँपालिकाबाट लागूऔषधसहित एक युवक पक्राउ परेका छन्।
गत असोज ५ गते साँझ करिब ५ः३० बजे गोप्य सूचनाका आधारमा प्रहरी चौकी आँखिसल्लाबाट खटिएको प्रहरी टोलीले शहीदभूमि गाउँपालिका–७ चाम्चास्थित एक घरमा खानतलासी गरेको थियो।
सो क्रममा घरकोठाबाट TRAMOL-50 का २९ पत्ता (२९० क्याप्सुल) र SPASPAIN PRO का २९ पत्ता (२९० ट्याब्लेट) बरामद भएको जिल्ला प्रहरी कार्यालय धनकुटाले जनाएको छ।
प्रहरीले लागूऔषधसहित सोही स्थानका अन्दाजी २१ वर्षीय प्रगत राईलाई नियन्त्रणमा लिई जिल्ला प्रहरी कार्यालय धनकुटामा ल्याएको छ। घटनाबारे थप अनुसन्धान भइरहेको प्रहरीले जनाएको छ।
