भारी वर्षाको जोखिमपछि धनकुटा नगरपालिकाका विद्यालयमा दुई दिन बिदा
धनकुटा । भारी वर्षा, हावाहुरी तथा चट्याङको सम्भावनालाई मध्यनजर गर्दै धनकुटा नगरपालिकाले नगर क्षेत्रभित्रका सम्पूर्ण विद्यालयमा दुई दिन बिदा दिने निर्णय गरेको छ।
धनकुटा नगरपालिकाको शिक्षा, युवा तथा खेलकुद विकास शाखाले बिहीबार सूचना जारी गर्दै असोज ८ र ९ गते नगर क्षेत्रका सबै विद्यालयमा बिदा दिने जनाएको हो।
नगरपालिकाका अनुसार सामुदायिक, धार्मिक, निजामती आवासीय तथा संस्थागत सबै विद्यालयमा बिदा लागू हुनेछ। उक्त बिदा लामो बिदाबाट कट्टा हुने गरी दिइएको सूचनामा उल्लेख छ।
जल तथा मौसम विज्ञान विभाग, राष्ट्रिय विपद् जोखिम न्यूनीकरण तथा व्यवस्थापन प्राधिकरण तथा सम्बन्धित क्षेत्रका विज्ञहरूको पूर्वानुमानअनुसार असोज ९, १० र ११ गते देशका विभिन्न स्थानमा भारी वर्षा, उच्च पहाडी तथा हिमाली क्षेत्रमा हिमपात, हावाहुरी र चट्याङको सम्भावना रहेको छ।
मौसम प्रतिकूल हुने सम्भावना तथा भारी वर्षा र हावाहुरीका कारण विद्यार्थी तथा विद्यालयमा पर्न सक्ने जोखिमलाई ध्यानमा राख्दै बिदा दिने निर्णय गरिएको धनकुटा नगरपालिकाले जनाएको छ।
नगरपालिकाले सम्बन्धित सबै विद्यालयलाई सूचनाअनुसार बिदा कार्यान्वयन गर्न आग्रह गरेको छ।
