बजार अनुगमन : फुलतारा डेरीलाई २ लाख जरिवाना, माछा–मासु पसललाई सुधारको चेतावनी
सञ्जय मिश्रा/रौतहट, १५ असोज । चाडपर्व नजिकिँदै गर्दा रौतहटको सदरमुकाम गौरमा बजार अनुगमन तीव्र पारिएको छ। अनुगमनका क्रममा म्याद गुज्रिएका तथा गुणस्तरमा कैफियत देखिएका खाद्यवस्तु बिक्रीका लागि राखेको भेटिएपछि एक डेरी तथा मिठाई पसललाई २ लाख रुपैयाँ जरिवाना गरिएको छ।
वाणिज्य, आपूर्ति तथा उपभोक्ता संरक्षण कार्यालय वीरगन्ज, जिल्ला प्रशासन कार्यालय रौतहट, गौर नगरपालिका तथा उद्योग वाणिज्य संघको संयुक्त टोलीले गौर–बुधवार घण्टाघरस्थित फुलतारा डेरी एन्ड स्विट्स भण्डारमा अनुगमन गर्दा कैफियत भेटिएपछि उक्त जरिवाना गरेको हो।
अनुगमन टोलीले खाद्यवस्तुको म्याद, लेबल, भण्डारणको अवस्था, मूल्यसूची तथा बिल–बिजकसमेत जाँच गरेको जनाएको छ।
त्यस्तै, गौर क्षेत्रका माछा तथा मासु पसलमा पनि अनुगमन गरिएको छ। टोलीले व्यवसायीलाई मूल्यसूची अनिवार्य राख्न, व्यवसाय दर्ता गर्न, पसल तथा बिक्रीस्थलको सरसफाइ कायम गर्न र स्वच्छ तथा गुणस्तरीय माछा–मासु बिक्री गर्न निर्देशन दिएको छ।
जिल्ला प्रशासन कार्यालय रौतहटका प्रतिनिधि उमेश कुमार साहका अनुसार पहिलो चरणमा व्यवसायीलाई सुधारका लागि निर्देशन दिइएको हो। निर्देशन पालना नगरे आगामी अनुगमनमा प्रचलित कानुनअनुसार जरिवाना तथा अन्य कारबाही गरिने चेतावनी दिइएको छ।
चाडपर्वमा अनुगमनको चुनौती
चाडपर्वको समयमा खाद्यवस्तुको कारोबार र उपभोग दुवै बढ्ने भएकाले बजारमा गुणस्तरहीन तथा म्याद गुज्रिएका वस्तुको जोखिम पनि बढ्न सक्छ। यस्तो अवस्थामा अनुगमन केवल जरिवानामा सीमित नभई नियमित र प्रभावकारी हुनुपर्ने देखिन्छ।
विशेषगरी माछा–मासु पसलमा सरसफाइ, भण्डारण र मूल्यसूचीको विषयमा दिइएको निर्देशन कार्यान्वयन भए–नभएको आगामी अनुगमनबाट स्पष्ट हुनेछ। त्यसैले पहिलो अनुगमनमा दिइएको चेतावनीपछि पनि सुधार नभए कानुनी कारबाहीलाई निरन्तरता दिनुपर्ने आवश्यकता देखिन्छ।
चाडपर्वलाई लक्षित गर्दै बजारमा उपभोक्ता ठगी तथा गुणस्तरहीन खाद्यवस्तुको बिक्री रोक्न अनुगमनलाई निरन्तरता दिने संयुक्त टोलीले जनाएको छ।
