धनकुटाको भेडेटारमा दुर्घटनामा परेको स्कार्पियोबाट ३४१ किलो गाँजा बरामद, एक जना पक्राउ
धनकुटा,२१ असोज । धनकुटाको साँगुरीगढी गाउँपालिका–६ भेडेटारमा दुर्घटनामा परेको स्कार्पियो गाडीबाट ३४१ किलो गाँजा बरामद भएको छ। घटनामा शंकास्पद अवस्थामा भेटिएका एक जनालाई प्रहरीले नियन्त्रणमा लिएको छ।
जिल्ला प्रहरी कार्यालय धनकुटाका अनुसार मंगलवार राति करिब ११ः५५ बजे ढुंगेबाट भेडेटारतर्फ आउँदै गरेको बा.१३ च ६२७५ नम्बरको स्कार्पियो भेडेटारस्थित स्काईवाक नजिकै भित्री सडकबाट करिब १५ मिटर तल खसेर दुर्घटना भएको थियो।
दुर्घटनाको सूचना पाएपछि इलाका प्रहरी कार्यालय भेडेटारबाट प्रहरी नायब निरीक्षक भीमबहादुर श्रेष्ठको कमाण्डमा टोली घटनास्थल पुगेको थियो। प्रहरीले गाडी जाँच गर्दा बोरामा प्याक गरी राखिएको ३४१ किलो गाँजा बरामद गरेको हो।
दुर्घटनाग्रस्त गाडीभित्र भने कोही फेला परेनन्। घटनास्थल नजिकै शंकास्पद अवस्थामा रहेका मोरङको विराटनगर महानगरपालिका–९ घर भई हाल सुनसरीको धरान उपमहानगरपालिका–१० बस्ने ३९ वर्षीय अमित विश्वकर्मालाई प्रहरीले नियन्त्रणमा लिएको छ।
बरामद गाँजा र स्कार्पियोसहित विश्वकर्मालाई जिल्ला प्रहरी कार्यालय धनकुटामा ल्याई घटनाबारे थप अनुसन्धान भइरहेको प्रहरीले जनाएको छ।
