धनकुटा स्थित तमोर नदीको ढुङ्गामा फसेका युवकको सकुशल उद्धार
धनकुटा, असोज २७ । धनकुटा नगरपालिका–८ स्थित तमोर नदीको किनारमा रहेको ढुङ्गामा फसेका एक युवकको नेपाल प्रहरी, सशस्त्र प्रहरी र स्थानीय युवाहरूको सहयोगमा सकुशल उद्धार गरिएको छ।
उद्धार गरिएका युवक मोरङको ग्रामथान गाउँपालिका–१ निवासी अन्दाजी २८/२९ वर्षीय अर्जुन सरदार हुन्। उनी रगुवा खोला क्षेत्रमा पुल निर्माण गरिरहेको समिनारायण कन्स्ट्रक्सन प्रा.लि.मा काम गर्दै आएका थिए।
जिल्ला प्रहरी कार्यालय धनकुटाका अनुसार असोज २६ गते साँझ ५ः३० बजे तमोर नदीको किनारमा रहेको ढुङ्गामा एक व्यक्ति फसेको सूचना प्राप्त भएपछि प्रहरी नायव उपरीक्षक हेमन्त भण्डारी क्षेत्रीको कमाण्डमा १५ जना प्रहरीको टोली र सशस्त्र प्रहरी बल नेपाल धनकुटाबाट सशस्त्र प्रहरी नायव उपरीक्षक राजेश फुयालको कमाण्डमा टोली परिचालन गरिएको थियो।
प्रहरी र सशस्त्र प्रहरीको संयुक्त टोलीले स्थानीय युवाहरूको सहयोगमा वैकल्पिक बाटोबाट गएर राति ११ः५८ बजे सरदारको सकुशल उद्धार गरेको हो।
उद्धारपछि सोधपुछ गर्दा सरदार दशैँको बिदामा घर जान मुलघाटतर्फ निस्किने क्रममा तमोर नदीमा पौडी खेलेर पारि पुगेको र त्यसपछि बाटो नभेटेपछि अलपत्र परेको खुलेको प्रहरीले जनाएको छ।
उद्धार गरिएका सरदारलाई निर्माण कम्पनीका प्रतिनिधि शिवनारायण यादवको जिम्मा लगाइएको जिल्ला प्रहरी कार्यालय धनकुटाले जनाएको छ।
उद्धार कार्यमा स्थानीय युवा सुमन राई, सुरेश राई, आर्यन याख्खा र दिनेश याख्खाले सहयोग गरेका थिए।
