धनकुटा । कोशी प्रदेश सरकारका स्वास्थ्य मन्त्री इन्द्रमणि पराजुलीले धनकुटा जिल्लाका विभिन्न स्थानमा रहेका प्रहरी चौकी तथा इलाका प्रहरी कार्यालयको अनुगमन तथा निरीक्षण गर्नुभएको छ।

मन्त्री पराजुलीले कात्तिक ६ गते शुक्रबार धनकुटा नगरपालिका–१ स्थित हिले प्रहरी चौकीबाट अनुगमन सुरु गर्नुभएको थियो। सो क्रममा उहाँले बिहान ९ बजेर १५ मिनेटदेखि १० बजेसम्म जोरपाटी प्रहरी चौकी, १० बजेर १५ मिनेटदेखि ११ बजेसम्म सिदुवा प्रहरी चौकी तथा ११ बजेर ३० मिनेटदेखि दिउँसो १२ बजेर ३० मिनेटसम्म जितपुर प्रहरी चौकीको अनुगमन तथा निरीक्षण गर्नुभएको थियो।

त्यसैगरी, दिउँसो १ बजेर ३० मिनेटदेखि २ बजेसम्म लेगुवा प्रहरी चौकी र ३ बजेदेखि ३ बजेर ३० मिनेटसम्म पाख्रीबास प्रहरी चौकीको अनुगमन गर्नुभएको थियो। मन्त्री पराजुलीले बेलुका ५ बजेदेखि छिन्ताङस्थित इलाका प्रहरी कार्यालयको समेत अनुगमन तथा निरीक्षण गर्नुभएको हो।

अनुगमन तथा भेटघाटका क्रममा मन्त्री पराजुलीले प्रहरी कार्यालयहरूको अवस्था र कार्यसम्पादनबारे जानकारी लिनुभएको थियो।