दक्षिणबाट उत्तर बग्ने धनकुटास्थित खोलामा ‘उत्तरगंगा स्नान स्थल’ स्थापना गरियो
धनकुटा खबर । धनकुटाको मुलघा,ट स्थित दक्षिणबाट उत्तर बग्ने लेउती खोला किनारमा उत्तरगंगा धार्मिक स्नान स्थानको स्थापना गरिएको छ । लेउती जलधार प्रकृति प्रवद्धन समितिले सोमबार एक कार्यक्रम गरी प्रदेश सभासद निरन राईबाट स्नान स्थलको उद्घाटन गराएका हुन् ।
प्रदेश सरकारको रु १० लाख अनुदान र श्रमदानगरी ११ लाख ३७ हजारको लागतमा उक्त स्नान स्थल निर्माण गरिएको समितिका अध्यक्ष बलबहादुर राईले जानकारी दिए ।
साँगुरीगढी गाउँपालिका १ स्थित निर्मित उक्त स्थानमा हाल ५ वटा ढुंगेधारा,प्रतिक्षालय,शौचालय लगाएतका पूर्वाधारहरु निर्माण भएको उपभोक्ता समितिका अध्यक्ष रोशन माझीले जानकारी दिए ।
धरान र धनकुटाको सिमानामा रहेको चुरे क्षेत्रबाट बग्ने यो लेउती खोला दक्षिणबाट उत्तर तर्फ बगेर तमोर नदीमा मिसिने गर्दछ । आगामी बर्षहरुमा थप भौतिक निर्माणहरु गरिने यो स्नान स्थल हिन्दु धर्मालम्बीहरुको एक पवित्र धार्मिक स्थल हुने स्थानियबासिहरुको भनाई छ ।
