नेपाल सरकार र विश्व बैंकबीच वित्तीय सम्झौता पत्रमा हस्ताक्षर
काठमाडौँ/नेपाल सरकार र विश्व बैंक बीच ‘ग्रामीण उद्यम र आर्थिक विकास’ आयोजनाका लागि ९ अर्ब ५० करोड रुपैयाँ ८ करोड अमेरिकी डलर बराबरको वित्तीय सम्झौता पत्रमा हस्ताक्षर भएको छ ।
प्रदेश १, प्रदेश २, वाग्मती प्रदेश, गण्डकी प्रदेश, लुम्बिनी प्रदेश र सुदूरपश्चिम प्रदेशका मुख्य आर्थिक कोरिडोरमा आयोजना कार्यान्वयन हुने गरी आज अर्थ मन्त्रालयमा आयोजित एक कार्यक्रमका बीच उल्लेखित डलर बराबरको सम्झौता पत्रमा हस्ताक्षर भएको हो ।
सम्झौता पत्रमा नेपाल सरकारकतर्फबाट अर्थ मन्त्रालयका सचिव शिशिर कुमार ढुंगाना र विश्व बैंकको तर्फबाट माल्दिभ्स, नेपाल र श्रीलंकाका लागि राष्ट्रिय निर्देशक फरिस हदाद जर्भोसले हस्ताक्षर गरेका छन् । यसले ग्रामिण कृषि उत्पादनको बजार पहुँच र ग्रामीण उद्यमशिलताको प्रवर्द्धन गर्दै कोभिड महामारी पछिको आर्थिक पुनरउत्थानलाई अभिवृद्धि गर्ने,ग्रामीण उत्पादक समूह र बजारबीच उत्पादनशिल सझेदारीको सहजिकरण गर्दै मूल्य तथा रोजगारी अभिवृद्धि गर्दै,उच्च मूल्यका आन्तरिक र अन्तर्राष्ट्रिय बजार मूल्य श्रृंखलाको विकास गर्दै बजार श्रृंखलामा दिर्घकालिन समावेशिकरणलाई बढाउने विश्वास गरिएको छ ।
कार्यक्रममा अर्थ मन्त्रालयका सचिव शिशिर कुमार ढुंगानाले आयोजना कार्यान्वयनमा गएपछि नेपालको कृषि र बजारको सम्बन्धलाई स्थापित गर्ने र कृषि–व्यवसायमा बढ्ने प्रतिस्पर्धाले कोभिड महामारी पछिको आर्थिक पुनरउत्थानलाई सघाउने बताउनुभयो ।
