नगरबासीहरुलाई रोग प्रतिरोधात्मक क्षमता बढाउने औषधि खुवाइंदै
धनकुटा,६ जेठ । गाउँ–गाउँमा कोरोना संक्रमण फैलिरहेका बेला धनकुटाको महालक्ष्मी नगरबासीहरुलाई रोग प्रतिरोधात्मक क्षमता बढाउने औषधि खुवाउन थालिएको छ ।
नगरपालिकाले नगरका सबै नागरिकको रोग प्रतिरोधात्मक क्षमता बढाउन कम्तिमा एक महिना सेवन गर्न पुग्ने गरी होमियोप्याथिक औषधि निःशुल्क वितरण गर्न थालेको हो ।
नगरबासीको रोग प्रतिरोधात्मक क्षमता बृद्धि गरी कोरोना सहित अन्य रोग लाग्नबाट बचाउँन सबै नगरबासीलाई रोग प्रतिरोधात्मक क्षमता बढाउँने औषधि खुवाउँन थालिएको महालक्ष्मी नगरपालिकाका मेयर पर्शुराम नेपालले बताउनुभयो ।
अहिले शतर्कता अपनाउँदा अपनाउँदै पनि गाउँ–गाउँमा कोरोना फैलिएको उहाँले वताउनुभयो । कोरोनाको औषधि पनि नहुँदा यसको नियन्त्रणमा निकै चुनौति देखिएकाले नगरबासीलाई बचाउँन वैकल्पिक उपाय खोजेको भन्दै मेयर नेपालले भन्नुभयो, ‘हामीले महालक्ष्मी नगरबासी सबै नागरिकलाई यो औषधि खुवाउँदैछौ ।
इम्युनिटी पावर बढ्यो भने कोरोना सहित अन्य रोगको पनि संक्रमण कम होला भन्ने अनुमान गरेका छौं ।’ चिकित्सक सँगको परामर्श अनुसार नै महालक्ष्मी नगरपालिकाले यो अभियान शूरु गरेको हो ।
रोग प्रतिरोधात्मक क्षामता बृद्धि गर्ने भएकाले यो औषधि सेवनका लागि स्वास्थ्य मन्त्रालयले पनि अनुमति दिएको बताइएको छ । अहिले धनकुटा सदरमुकाम स्थित जनभावना होमियोप्याथिक हस्पिटल सँगको सहकार्यमा औषधि वितरण गर्न थालिएको छ ।
जनभावना हस्पिटलका सञ्चालक डा.खगेन्द्र कटुवाल सहित स्वास्थ्यकर्मी, जनप्रतिनिधि र नगरका कर्मचारीहरु औषधि वितरणमा खटिएका छन् । सबै नगरबासीलाई औषधि सेवन गराउँन नगरपालिका मार्फत वडा कार्यालय, टोलका अध्यक्ष र महिला स्वास्थ्य स्वयंसेवीकाहरु मार्फत औषधि वितरण गर्ने तयारी गरिएको छ ।
पहिलो चरणमा वडा नं. १, २, ६, ८ र ९ वडा कार्यालयमा औषधि पुर्याइ सकिएको छ । वाँकी सबै वडामा पनि केही दिनभित्रै औषधि पुर्याएर सबै नागरिकलाई औषधि वितरण गरिने बताइएको छ । रोग प्रतिरोधात्मक क्षमता बढाउँने होमियोप्याथिक औषधि भएकाले सबै उमेर समूहका मानिसले यो औषधि सेवन गर्न मिल्ने जनभावना हस्पिटलका सञ्चालक डा.कटुवालले बताउँनुभयो ।
हरेक व्यक्तिमा रोगसँग लड्ने रोग प्रतिरोधात्मक क्षमता हुने र त्यो कमजोर भयो भने बिभिन्न रोग लाग्ने भन्दै उहाँले रोग प्रतिरोधात्मक क्षमता मजवुत भएका व्यक्तिले कारोना जस्ता धेरै रोगका भाइरसलाई पराजित गर्न सक्ने वताउनुभयो । आफुहरुले अहिले एक महिनासम्म सेवन गर्न पुग्ने गरी हरेक व्यक्तिलाई १८-१८ गोली ‘इम्युन बुष्टर’ औषधि दिन थालेको वताउनुभयो । यसले रोग प्रतिरोधात्मक क्षमता बढाउँने भएकोले कोरोना मात्र नभई जुनसुकै रोगको पनि संक्रमण कम गर्ने डा कटुवालको भनाई छ ।
महालक्ष्मी नगरको कूल जनसंख्या करिब ३० हजार छ । कतिपय व्यक्ति गाउँमा नभएकाले अहिले २० हजारलाई औषधि तयारी गरिएको छ । अपुग भए थप गरेर नगरबासी सबैलाई औषधि खुवाइने उप–मेयर मञ्जु अधिकारीले बताउनुभयो ।
पहिलो चरणमा एक महिनाका लागि सबैलाई यो औषधि खुवाउँने र त्यसको प्रभावकारीता हेरेर पुनः औषधि थप्न सकिने महालक्ष्मी नगरपालिकाले जनाएको छ ।
