सेने र तिगेला पत्रकार महासंघको केन्द्रीय प्रतिनिधिमा चयन
लण्डन । गत २५ जुन २०२१ का दिन नेपाल पत्रकार महासंघ युकेको नवनिर्वाचित कार्यसमितिको दोस्रो बैठकले पत्रकार श्रीमति विमला सेने र विश्वास दीप तिगेलालाई केन्द्रीय प्रतिनीधिको रुपमा चयन गरेको छ ।
लण्डनको ब्ल्याकहिथ स्थित एभरेष्ट इनमा पदाधिकारी तथा सदस्यहरुको सशरिर उपस्थिती रहेको बैठकले सो निर्णय गरेको हो । बैठकले युके समितिको सदस्यमा वाचश्पति रेग्मी, मिलन तमु र वंम सूर्यवंशीलाई मनोनयन गरेको छ । त्यस्तै गरि सल्लाहकारहरुमा निवर्तमान अध्यक्ष नरेश खपाङ्गी र भर्खरै सम्पन्न निर्वाचनमा उपविजेता बनेका श्याम लुईटेललाई थप गरेका छन ।
बैठकले विभिन्न विभागिय जिम्मेवारी समेत तोकको छ । पत्रकार सेने गोर्खा च्यानलकी संचालिका तथा विगत ३ दशक देखि रेडियो तथा टेलिभिजन पत्रकारिता गरेकी हुन भने तिगेला नेपाली समाचार साप्ताहिक पत्रिका (नेपालीसमाचार डटकम) का प्रकाशक तथा सम्पादन तथा अढाई दशक देखि प्रिन्ट पत्रकारितामा आबद्ध ब्यक्ति हुन । दुबै जना द इन्टरनेशनल फेडरेसन अफ जर्नालिष्टका सदस्य समेत हुन । पत्रकार महासंघ नेपालको विधान २०७५ बमोजिम युकेबाट दुईजना मात्र केन्द्रीय प्रतिनीधि/सभासद पठाउन सक्ने ब्यवस्था रहेको छ ।
महासंघ युकेका अध्यक्ष ध्रुवराज अर्यालको अध्यक्षतामा बसेको बैठकलाई सचिव नरेन्द्र कुमार बस्नेतले संचालन गरेका थिए । सोहिदिन साँझ पूर्वघोषित यस बर्षको खोज पत्रकारिता पुरस्कार श्रीभक्त खनाललाई खदा सहित नगद ५ सय २ पाउण्ड निवर्तमान अध्यक्ष नरेश खपाङ्गी, पूर्वअध्यक्ष नबिन पोखरेल र अध्यक्ष अर्यालले हस्तान्तरण गरेका थिए ।
