लघु जलविद्युतले गाउँ झलमल्ल
ईश्वर थापा/ धनकुटा, १८ भदौ । धनकुटाको महालक्ष्मी नगरपालिकाको मारेककटहरेमा रहेको लक्ष्मीखोला लघुजलविद्युत आयोजनाबाट तीन सय ६० परिवारले लाभ लिइरहेका छन्।
राष्ट्रिय प्रसारण लाइनमा विद्युत अनियमित भइरहेका बेला स्थानीय समुदायले आफ्नै अग्रसरतामा सञ्चालन गरिरहेका लघु विद्युत आयोजनाले गाउँ झलमल्ल पारेको छ। लक्ष्मीखोला जलविद्युत आयोजनाले गाउँमा नियमित विजुली दिइरहेको छ।
यसले ग्रामीण क्षेत्रका नागरिकको जीवनयापन सहज बनाएकाे छ । यहाँका वासिन्दा त्यसअघिसम्म टुकीकाे भरमा थिए । थिए।
जलविद्युत उत्पादन सहकारीका अध्यक्ष तेजबहादुर अधिकारीका अनुसार ४० किलोवाटसम्म विद्युत उत्पादन हुँदै आएको छ। व्यवसायिक रुपमा पशुपालन बढेसँगै च्यापकटर प्रयोग बढेकाे र यसले विद्युत खपत बढाएकाे उनले बताए । अधिकारीका अनुसार बेलुका ५ देखि ९ बजेसम्म र बिहान ५ देखि ९ बजेसम्म माग धान्न समस्या भएको छ भने बिहान ९ बजेदेखि बेलुका ५ बजेसम्म उत्पादन भएको विद्युत पनि खपत भएको छैन।
राष्ट्रिय प्रसारण लाइनको विद्युत महसुल २० युनिटसम्म निशुल्क बनाउने चर्चा चलिरहेको बेला लघु जलविद्युत आयोजनाका उपभोक्ता भने ८ युनिटसम्मको एक सय रुपैयाँ शुल्क तिर्न बाध्य छन्। आयोजनाले ८ युनिटदेखि २० युनिटसम्म प्रतियुनिट ८ रुपैयाँ र २० युनिटदेखि माथि प्रतियुनिट ६ रुपैयाँका दरले महसुल लिँदै आएको स्थानीय हिस्मा मगरले बताइन्।
आयोजनाले २०६८ सालदेखि नियमित ४० किलोवाट विद्युत उत्पादन गर्दै आएको छ। १ करोड २५ लाख रुपैयाँ खर्च गरेर निर्माण गरिएकाे आयोजनाले १० वर्ष पूरा गरिसकेको छ। आयोजनाको धेरै पोल बाँस र पाेलका छन्। हावाहुरीका बेला पाेल ढल्ने त्रास हुने गरेकाे स्थानीय चुडामणी मगरले बताए।
सहकारीका अध्यक्ष अधिकारीले राष्ट्रिय प्रसारण लाइन लाइनमा जोड्न ५० लाखका उपकरण चाहिने भए पनि आर्थिक अवस्थाले नधान्ने भएपछि दाताको खोजी भइरहेकाे बताए ।-न्युज कारखाना
