अवैध रुपमा निकासीका लागि तयार गरिएको सालका चिरान काठ प्रहरीद्वारा बरामद
धनकुटा । अवैध रुपमा निकासीका लागि तयार गरिएको सालका चिरान काठ धनकुटाको सहिदभुमी गाउँपालिकाको विभिन्न स्थानबाट प्रहरीले बरामद गरेको छ ।
सहिदभुमी गाउँपालिका ५ खोकु देखी घोङ्टाङ जाने कच्ची सडक बाटोमा निकालेर राखेको अवस्थामा प्रहरी चौकी आखिसल्लाबाट खटीएको गस्ति टोलीले अशोज २२ गते सालको ९० थान चिरान काठ नियन्त्रणमा लिएको हो ।
बरामद काठहरु ईलाका प्रहरी कार्यलय छिन्ताङमा राखेको प्रहरीले जनाएको छ । बरामद काठ सब-डिभिजन वन कार्यालय आँखिसल्ला धनकुटाबाट कर्मचारी खटी नापजाच गर्दा ३०.५५ क्यु फिट रहेको जनाईएको छ ।
त्यस्तै सहिदभुमी गाउँपालिका ५ कै खोकु पुछार माझिटेन बनमा अज्ञात व्यक्तीले अवैध रुपमा काटी चिरानी ८० र गोलिया ५६ गरी १३६ वटा निकासी गर्न राखेको अवस्थामा प्रहरीले फेला पारी अशोज २३ गते नियन्त्रणमा लिएको छ ।
सो काठ वन कार्यालय आँखिसल्लाका कर्मचारीहरुले नाप जाच गर्दा ६८.२६ क्यु फिट रहेको जनाईएको ।
त्यस्तै २३ गते नै सहिदभुमि गाउँपालिका ५ खोकु पुछारको वनबाट पनि अवैध रुपमा चिरानी गरी निकासी गर्न राखेको अवस्थामा प्रहरी चौकी आखिसल्लाबाट प्रहरी सहायक निरिक्षक कप्लेश्वर स्वर्णकारको कमाण्डमा खटीएको ४ जनाको गस्ति टोलीले फेला पारी बरामद गरेको र थप अनुसन्धानको लागि ईलाका प्रहरी कार्यलय छिन्ताङवाट प्रहरी नायव निरिक्षक दिलिप कुमार श्रेष्ठको कमाण्डमा खटिएको ६ जनाको प्रहरी टोलीले १७३ थान सालको चिरान काठ नियन्त्रणमा लिएको छ । सब-डिभिजन वन कार्यालयको अनुसार सो काठ नाप जाच गर्दा ७२.९७ क्यु फिट हुन आउछ ।
अबैध रुपमा काठ निकासी गर्ने व्यक्तीहरुको खोजी भईरहेको प्रहरीले जनाएको छ ।
