अपडेट : धनकुटा नगरपालिका प्रमुखमा एमालेका चिन्तन तामाङ,उपप्रमुखमा खनाल बिजयी
धनकुटा । धनकुटा जिल्लाको धनकुटा नगरपालिकाको मतगणना सम्पन्न भएको छ ।
निर्वाचन आयोगका अनुसार धनकुटा नगरपालिका प्रमुखमा नेपाल कम्युनिष्ट पार्टी (एमाले) उम्मेदवार चिन्तन तामाङ ७,६६६ मत ल्याई विजयी भएका छन् ।
उनले निकटतम प्रतिद्वन्द्वी नेपाली कांग्रेस उम्मेदवार दिनेश राईलाई १४ मतान्तरले पराजित गरेका हुन् । पराजित दिनेश राईले ७,६५२ मत ल्याएका छन् ।
त्यसैगरि उपप्रमुख पदमा एमालेका भिमादेवी खनाल(शान्ता) ले ७ हजार १ सय ९६ मत प्राप्त ल्याई बिजयी भएका छन् भने गठबन्धनबाट नेकपा माओवादीका गणेश बहादुर बिष्टले ६ हजार ६ सय २९ मत ल्याएका छन् ।
सिदिङ्वाको अध्यक्षमा एमाले र उपाध्यक्षमा गठबन्धन विजयी
फुङ्लिङ, ३ जेठ (रासस)ःताप्लेजुङको सिदिङ्वा गाउँपालिकाको अध्यक्षमा एमालेका मानबहादुर राई र उपाध्यक्षमा गठबन्धनको तर्फबाट माओवादी केन्द्रका कृष्णकुमारी कडरिया(बन्दना) एक मतले विजयी हुनुभयो । राई तीन हजार ८५ मतका साथ अध्यक्षमा विजयी हुँदा उहाँका निकटतम प्रतिद्वन्द्वीले दुई हजार ३८२ मत प्राप्त गर्नुुभएको जिल्ला निर्वाचन कार्यालयले जनाएको छ । उहाँहरुको ७०३ मतको मत अन्तर रहेको छ ।
उपाध्यक्षमा गठबन्धनतर्फ माओवादी केन्द्रकी उम्मेदवार कृष्णकुमारी कडरीया (बन्दना) एक मतान्तरले विजयी हुनुभएको छ । कडरियाले दुई हजार ३७६ र स्वतन्त्र उम्मेदवार जीवनकुमार ताम्लिङले दुई हजार ३७५ मत प्राप्त गर्नुभयो । कडरीया माओवादीबाट अघिल्लो पटक सोही पालिकाको उपाध्यक्षमा निर्वाचित हुनुभएको थियो । ताम्लिङले गठबन्धनको निर्देशन नमानेको र पार्टीले कारबाही गरेसँगै उहाँ स्वतन्त्ररुपमा उम्मेदवार बन्नुभएको थियो ।
चुलाचुली गाउँपालिका अध्यक्षमा नेपाली कांग्रेस विजयी
मङ्गलबारे, ३ जेठ (रासस) ः
चुलाचुली गाउँपालिकाको अध्यक्षमा नेपाली कांग्रेसका राजेन्द्र केरुङ विजयी हुनुभएको छ ।
नेकपा एमालेका ओम नारायण खनाललाई दुई हजार ८९५ मतान्तरले पछि पार्दै उहाँ गाउँपालिकाका अध्यक्षमा निर्वाचित हुनुभएको हो । केरुङले छ हजार ६५० मत ल्याउनुभएको छ भने उहाँका निकटतम् प्रतिद्वन्द्वी खनालले तीन हजार ७५५ मत ल्याउनुभएको छ । यसैगरी नेकपा (एकीकृत समाजवादी) का नारायण लावतीले ५०५ मत ल्याउनुभएको छ ।
त्यस्तै गाउँपलिकाको उपाध्यक्षमा नेकपा एमालेका दिलकुमारी लिम्बू (लावती)ले चार हजार ४५० मत ल्याएर विजयी हुनुभएको छ । उहाँको निकटतम् प्रतिद्वन्द्वी नेकपा (माओवादी केन्द्र) का सुकबहादुर लावतीले तीन हजार ४४२ मत ल्याउनुभएको हो ।
सो गाउँपालिकामा कूल १८ हजार ५८० मतदातामध्ये १२ हजार ८९४ मत खसेको थियो ।
