छथर जोरपाटीका थापाले गरे ५ लाख लगानीमा घरमै छुर्पी बनाएर बेच्न सुरु
धनकुटा । धनकुटाको छथर जोरपाटी गाउँपालिका ६ मजुवाका युवाराज थापाले छुर्पी उत्पादन गर्न थाल्नु भएको झण्डै ५ महिना भयो । यसअघि आफुले उत्पादन गरेको दुध सिंधुवा वजारसम्म ल्याएर बेच्दै आउनुभएका थापाले करिब ५ लाख लगानीमा गत फागुन महिनादेखी घरमै छुर्पी बनाएर बेच्न थाल्नु भएको हो ।
उहाँले आफ्नो मात्र नभई त्यस स्थानका ४० घरपरिवार किसानले उत्पादन गरेको दुध समेत लिएर छुर्पी बनाउने गर्नुभएको छ । यसरी आफुले घरमै छुर्पी बनाउन थालेपछि आफु र अन्य नजिकका किसानहरुलाई समेत सहज भएको थापाको भनाई छ ।
दैनिक ५ सय लिटर दुधबाट छुर्पी बनाउदै आउनुभएका उहाँले प्रति किलो ११ सय रुपयाँका दरले विक्री गर्दै आउनु भएको छ । यसरी नजिकमै छुर्पी उत्पादन हुन थालेपछि एकातर्फ दैनिक दुध बोकेर बजार धाउनुपर्ने बाध्यता हटेको छ भने होलिडेको समस्या समेत समाधान भएको स्थानियको भनाई छ ।
फ्याट विनाको छुर्पी उत्पादन गर्दै आउनु भएका थापाले आफ्नो उत्पादन अमेरिकासम्म जाने गरेको बताउदै हाल बजारको खास समस्या नरहेको बताउनुभयो ।
आम्दानी पनि दुध बेच्दा र छुर्पी बनाउदा तुलनात्मक हिसाबले छुर्पीबाटै फाईदा हुनेगरेको उहाँको भनाई छ । उहाँले दुई जनालाई छुर्पी बनाउन काम समेत दिनुभएको छ ।
