बर्षाको कारण धनकुटामा समेत जनजिवन प्रभावित
धनकुटा,२६ असोज । लगातारको बर्षाको कारण धनकुटामा समेत जनजिवन प्रभावित भएको छ ।
केहि दिन यता परिरहेको बर्षाका कारण जनजिवन प्रभावित बनेको हो ।बर्षाका कारण सदरमुकाम धनकुटा बजारमा चहल पहल घटेको छ भने ग्रामिण सडकमा यातायात साधन नचल्दा दशैंमा गाउँघर गएकाहरुलाई कर्मथलो फर्कन समेत समस्या भएको छ ।
बर्षाका अन्य जिल्लाको जस्तो मानविय तथा भौतिक क्षति नभए पनि पाक्न लागेको र पसाउँदै गरेको धानबालीमा क्षति गरेको छ ।
यो पनि…
जडीबुटी निकासी नहुँदा व्यवसायी मर्कामा
नेपालगञ्ज, २६ असोज (रासस)ः करिब रु ४० करोड बराबरको झन्डै एक हजार टन जडीबुटी भारत निकासी नहुँदा व्यवसायी मर्कामा परेका छन् । भारतीय प्लान्ट क्वारेन्टिइनको सूचीमा दर्ता भएपछि जडीबुटी भारत निर्यात हुने जडीबुटी व्यवसायी सङ्घका केन्द्रीय अध्यक्ष टङ्कप्रसाद शर्माले जानकारी दिनुभयो ।
उहाँका अनुसार इलामदेखि दार्चुलासम्म सङ्कलन भएको विभिन्न प्रकारका जडीबुटी पाकिस्तान र बङ्गलादेशसमेत निर्यात भएको छ । “नेपालबाट जडीबुटी मुख्य निर्यात हुने देश चीन र भारत नै हो”, उहाँले भन्नुभयो । खासगरी जटामसी मार्क, अमला, गुर्जोलगायत विभिन्न प्रकारका प्रशोधित जडीबुटी विदेश निर्यात हुने गरेको छ ।
सरकारको नियमानुसार व्यवसायीले जडीबुटी प्रशोधन नगरी बेच्न नपाइने उल्लेख गर्दै सङ्घका केन्द्रीय अध्यक्ष शर्माले सरकारले जडीबुटी निर्यातमा सहजीकरण नगरेको आरोप लगाउनुभयो । यसमा सहजीकरण भए पैसामा देखिएको समस्यासमेत समाधान हुने उहाँले विश्वास व्यक्त गर्नुभयो ।
व्यवसायी रवीन्द्रनाथ शुक्लाले आफ्नो मात्रै करिब रु एक करोड बराबरको उत्पादन थन्किएको बताउनुभयो । जडीबुटी व्यवसायी सङ्घका अनुसार बाँकेमा जडीबुटीसम्बन्धी साना र ठूला गरेर १२ उद्योग छन् । गत वर्ष पाँच हजार टन जडीबुटी निर्यात गरेको सङ्घले यस वर्ष हालसम्म दुई हजार टन मात्र जडीबुटी निर्यात गरेको छ ।
नेपालका विभिन्न जिल्लामा सङ्कलन गरिएको ३० प्रकारको जडीबुटी नेपालगञ्ज ल्याएर भारततर्फ निकासी हुँदै आएकामा भारतले नयाँ नियम देखाएर निकासीमा अवरोध गर्दै आएको जडीबुटी सङ्घका पूर्वाध्यक्ष याकुब अन्सारीले बताउनुभयो । निकासीलाई सहज बनाउने हो भने लक्षित वर्गका किसानले बढीभन्दा बढी रोजगारी पाउने र व्यवसायीलाई समेत लाभ पुग्ने बताइएको छ ।
