धनकुटाबाट गोठमा थुनेर राखिएको बालकको उद्दार
धनकुटा,७ जेठ । धनकुटामा मानसिक सन्तुलन ठीक नभएको भनिएको बालकको प्रहरीले उद्दार गरेको छ ।
तेह्रथुमको फेदाप गाउंपालिका १ घर भइ हाल धनकुटाको छथरजोरपाटी गाउंपालिका ५ परेवादिन स्थित ससुराली घरमा बस्दै आएका सोम कुमार लिम्बुको ८ बर्षिया छोरा सुहाङ लिम्बूलाई आज उद्दार गरिएको हो ।
मानसिक सन्तुलन ठीक नभएको भनिएका बालकलाई विगत २ महिना देखि टाटीको बेराको गोठ बनाई थुनेर राखिएको भन्ने सामाजिक संजाल मार्फत जानकारी पाएपछि प्रहरी चौकी सिधुवाबाट प्रनानि नविन कुमार प्रधानको कमाण्डमा खटिएको टोलीले बालकको उद्दार गरेको जिल्ला प्रहरी कार्यालय धनकुटाका प्रवक्ता डीएसपी ओमप्रकाश खनालले बताए ।
उद्दार गरिएको बालकलाई भोलि नै स्थायी घर तेह्रथुम लगी जन्मदर्ता लगायत आवश्यक कागजपत्र बनाई उपचारको लागि काठमाडौ पठाउन समन्वय भैरहेको डीएसपी खनालले जानकारी दिए ।
