तराईमा अत्यधिक गर्मी बढेपछि भेडेटारमा पर्यटकहरूको घुइँचो, होटल र होमस्टे भरिभराउ
हिराराज राई,धनकुटा । पछिल्ला केही दिनदेखि तराई मधेसमा तापक्रम अत्यधिक बढेपछि पूर्वी पहाडी क्षेत्रको प्रमुख पर्यटकीय गन्तव्य भेडेटारमा पर्यटकहरूको आगमन बढेको छ। शीतल मौसम र रमणीय प्राकृतिक दृश्यका कारण भेडेटार अहिले आन्तरिक पर्यटकहरूको पहिलो रोजाइ बनेको देखिन्छ।
साँगुरीगढी गाउँपालिका–६ मा अवस्थित भेडेटारमा रहेका प्रमुख पर्यटकीय स्थलहरू स्काइवाक, पाथिभरा मन्दिर, नमस्ते झरना, ऐतिहासिक साँगुरीगढी किल्ला लगायतका स्थानहरू अहिले पर्यटकले खचाखच भरिएका छन्।
स्थानीय होटल व्यवसायी लिलाराज लावटीका अनुसार अहिले होटल, रिसोर्ट र होमस्टेहरू सबैजसो भरिभराउ छन्। “गर्मीबाट राहत लिन भेडेटार आउनेको संख्या हरेक दिन बढ्दै गएको छ,” होटल लावटी कर्नरका सञ्चालक लावटीले जानकारी दिनुभयो, “भेडेटारको मौसम शीतल छ, यहाँको दृश्यावलोकन गर्ने स्काइवाक र साँगुरीगढीको ऐतिहासिक महत्वले पर्यटकहरूलाई आकर्षित गरिरहेको छ।”
पर्यटन प्रवर्द्धनका लागि स्थानीय तह तथा व्यवसायीहरूको संयुक्त पहलपछि भेडेटार क्षेत्रमा पूर्वाधारको विकास हुँदै आएको छ। यसले यहाँको पर्यटन अझ फस्टाउने विश्वास गरिएको छ।
भेडेटार पुग्न धरानबाट छोटो यात्रामै सजिलै पुग्न सकिने भएकाले पनि यो गन्तव्य अझ लोकप्रिय बन्दै गएको हो। गर्मीका कारण तराईवासीहरूको उपत्यका र पहाडी क्षेत्रतर्फको आकर्षण बढिरहेको यस परिवेशमा भेडेटार एक प्रमुख वैकल्पिक गन्तव्यका रूपमा स्थापित हुँदै गएको स्थानीयवासीहरू बताउँछन्।
