ताप्लेजुङका १ सय ५४ शिक्षकलाई दियो रिड नेपालले तालिम
ताप्लेजुङ, पुस ३० गते । ताप्लेजुङको फक्ताङलुङ गाउँपालिकामा शैक्षिक तथा शिक्षण सिकाइ सामग्री निर्माण तालिम सम्पन्न भएको छ । ग्रामीण शिक्षा तथा वातावरण विकास केन्द्र (रिड नेपाल) को आयोजनामा गाउँपालिकाका तीनवटा वडाका १ सय ५४ शिक्षकहरूलाई दिइएको तालिम बुधबार सम्पन्न भएको हो ।
गत विहीबारदेखि सुरु भएको तालिम फक्ताङलुङ गाउँपालिका –३ सिंवामा अवस्थित सिंवा माध्यमिक विद्यालयमा सम्पन्न भएको छ । फक्ताङलुङ गाउँपालिकाका –१ सावादिन, वडा –२ खेजेनिम र वडा –३ लिङखिमका विद्यालयहरूमा कार्यरत शिक्षकहरूका लागि संयुक्त रुपमा तालिम आयोजना गरिएको थियो ।
सात दिनको शिक्षण सिकाइका क्रममा निर्माण भएका शैक्षिक सामग्रीको प्रर्दशन सहित तालिम सम्पन्न गरिएको रिड नेपाल ताप्लेजुङका प्रबन्धक राजेन्द्रप्रसाद पन्तले बताउनुभयो । तालिममा सहभागी भएका शिक्षकहरूले कक्षाकोठामा प्रयोग हुने शिक्षण सामग्री निर्माण गरी प्रर्दशन गरेका थिए ।
रिड नेपालले प्रदान गरेको तालिममा पहिलोपटक सहभागी शिक्षकहरू वीरेन्द्र दाहाल र निर्मला शेर्पाले तालिम उपलब्धीमूलक भएको भन्दै तालिमबाट प्राप्त भएको ज्ञान सीपलाई कक्षा कोठामा प्रयोग गर्ने विश्वास दिलाउनु भएको छ । रिड नेपालको कार्यक्षेत्र बिस्तार भएसँगै अब रिडको कार्यक्षेत्र फक्ताङलुङका ७ वटै वडा र सिरिजङ्गा गाउँपालिकाको वडा नं. ६, ७ र ८ गरी १० वटा वडा कार्यक्षेत्रमा कायम भएका छन् ।
तालिमको समापन समारोहका प्रमुख अतिथि फक्ताङलुङ गाउँपालिका अध्यक्ष राजन लिम्बू (मुक्ति), उपाध्यक्ष रवीन साम्रा (विकास), शिक्षा विकास तथा समन्वय इकाई ताप्लेजुङका प्रमुख योगेश्वर भट्टराई, फक्ताङलुङ गाउँपालिका ३ नं. वडाका वडाध्यक्ष आइतराम लिम्बू, सिँवा मावि बिद्यालय व्यवस्थापन समितिका अध्यक्ष मचिन्द्र लिम्बूको उपस्थित रहेको थियो ।
फक्ताङलुङ गाउँपालिकाका तीनवटा रिड नेपालको भर्खरै कार्यक्षेत्र बिस्तार हुँदा रिडको कार्यक्षेत्रमा समेटिएका हुन् । कार्यक्षेत्रमा बिस्तार भएपछि सेवा क्षेत्रका शिक्षकहरूका लागि पहिलो पटक यस्तो तालिमको आयोजना गरिएको रिड नेपालका शिक्षा विकास अधिकृत अमृता थलङले जानकारी दिनुभयो ।-रेडियो काबेली
