तामाङ जातिलाई डम्फू र टुङ्ना बजाउन सिकाउँदै लेटाङ नगरपालिका
लेटाङ । लेटाङ नगरपालिकाले तामाङ समुदायलाई तामाङ जातिको परम्परागत बाजा सम्बन्धि तालिम प्रदान गरेको छ । नगरपालिकाको आयोजनामा तामाङ जातिको बाजा डम्फू र टुङ्ना बजाउने १५ दिने तालिम सम्पन्न भएको हो ।
तालिममा तामाङ समुदायका १८ जना महिला र पुरुष सहभागी भएका छन् । तालिममा तामाङ सामुदायको परम्परागत बाजाका साथै तामाङ सामुदायको जन्मदेखि मृत्युसम्मका सँस्कारको विषयमा पनि जानकारी गराइएको छ ।
मंगलबार तालिमको समापन कार्यक्रम गर्दै सहभागीहरुलाई प्रमाणपत्र वितरण गरिएको छ । कार्यक्रममा नगर प्रमुख भूपेन्द्रकुमार लावती, उपप्रमुख कृष्णकुमारी निरौला, लेटाङ ४ का वडाध्यक्ष रामकुमार श्रेष्ठ, प्रशिक्षक लामा लगायतले सहभागीहरुलाई प्रमाणपत्र प्रदान गर्नुभयो ।
कार्यक्रममा बोल्दै नगर प्रमुख लावतीले तामाङ समुदायको परम्परागत बाजा लोप हुने संभावना भएकाले तामाङ जातिको पहिचान संरक्षणका लागि तालिम प्रदान गरिएको बताउनुभयो । १५ दिनसम्मको तालिममा प्रशक्षिक लामाले तालिम प्रदान गर्नुभयो ।
नगरपालिकाले आदिवासी जनजाति लक्षित कार्यक्रमलाई छुट्याएको बजेटबाट यसपटक तामाङ र नेवार जातिको बाजा बजाउने तालिम सञ्चालन गर्ने निर्णय गरिएकोमा पहिलो चरणमा तामाङ जातिको तालिम सञ्चालन गरिएको आदिवासी जनजाति महासंघ लेटाङका नगर अध्यक्ष बुद्धिमान राईले जानकारी दिनुभयो । उहाँले अब नेवार जातिको बाजा बजाउने तालिम पनि चाँडै सुरु गरिने जानकारी दिनुभयो ।
