अपूर्ण संविधान परिमार्जन गर्ने समय आएको छ : उपेन्द्र यादव
चितवन । जनता समाजवादी पार्टी (जसपा) नेपालका अध्यक्ष उपेन्द्र यादवले संविधानका अपूर्ण र विरोधाभासयुक्त पक्षहरूलाई संशोधन तथा परिमार्जन गर्ने ऐतिहासिक जिम्मेवारी राष्ट्रिय स्वतन्त्र पार्टी (रास्वपा) सहित राजनीतिक दलहरूको काँधमा आएको बताएका छन्।
रास्वपाको प्रथम महाधिवेशन उद्घाटन समारोहलाई आइतबार चितवनमा सम्बोधन गर्दै अध्यक्ष यादवले मुलुकलाई विगतका विकृति र विसंगतिबाट मुक्त गर्दै नयाँ दिशातर्फ लैजाने अवसर प्राप्त भएको बताए।
“अब मुलुकलाई विगतका विकृति–विसंगतिलाई त्यहीँ छाडेर नयाँ दिशामा लैजाने अवसर प्राप्त भएको छ। यो महाधिवेशन नयाँ युगको थालनीका लागि महत्वपूर्ण आधार बन्न सक्छ,” उनले भने।
यादवले संविधानसभाबाट जारी भएको वर्तमान संविधानमा संघीयता, गणतन्त्र, समावेशिता र धर्मनिरपेक्षताजस्ता महत्वपूर्ण उपलब्धि समेटिएको उल्लेख गर्दै त्यसको संरक्षण र प्रभावकारी कार्यान्वयन आवश्यक रहेको बताए। तर संविधानका केही प्रावधान अझै अधुरा, अपूर्ण र विरोधाभासयुक्त रहेको उनको धारणा थियो।
“संविधानमा महत्वपूर्ण उपलब्धिहरू समेटिएका छन्। तर कतिपय विषय अझै अमूर्त, अपूर्ण र विरोधाभासयुक्त छन्। त्यसैले समयानुकूल संशोधन र परिमार्जन आवश्यक छ,” उनले भने।
अध्यक्ष यादवले लोकतन्त्रलाई थप सुदृढ, समावेशी र जनमुखी बनाउन संविधानका कमजोरीहरू सच्याउनुपर्ने आवश्यकता औँल्याए। उनले संविधान संशोधनलाई वर्तमान राजनीतिक कार्यसूचीको महत्वपूर्ण विषयका रूपमा प्रस्तुत गर्दै त्यसका लागि सबै राजनीतिक शक्तिहरूले जिम्मेवारीपूर्वक भूमिका खेल्नुपर्ने बताए।
उनले संविधान परिमार्जनमार्फत मुलुकलाई राजनीतिक स्थायित्व, सुशासन र समृद्धिको दिशामा अघि बढाउन सकिने विश्वास व्यक्त गरे।
रास्वपाको प्रथम महाधिवेशनलाई सम्बोधन गर्ने क्रममा यादवले महाधिवेशनले नेपाली राजनीतिमा नयाँ बहस, नयाँ सोच र नयाँ युगको सुरुवात गर्न सक्ने अपेक्षा पनि व्यक्त गरेका थिए।
