शिव शिखर सहकारीका थप ९६ बचतकर्ताले पाए रकम, फिर्ता पाउने संख्या १,२१३ पुग्यो
काठमाडौं । समस्याग्रस्त शिव शिखर बहुउद्देश्यीय सहकारी संस्थाका थप ९६ जना बचतकर्ताले आफ्नो बचत रकम फिर्ता पाएका छन्। यससँगै सहकारीबाट रकम फिर्ता पाउने बचतकर्ताको संख्या १ हजार २१३ पुगेको समस्याग्रस्त सहकारी व्यवस्थापन समितिले जनाएको छ।
समितिका अनुसार पहिलो चरणमा न्यून रकम बचत गरेका सदस्यलाई प्राथमिकताका आधारमा बचत फिर्ता गर्ने कार्य भइरहेको छ। आगामी चरणमा बचत रकमको आकारअनुसार बचतकर्तालाई वर्गीकरण गर्दै क्रमशः भुक्तानी गरिने जनाइएको छ।
सरकारले समस्याग्रस्त सहकारी संस्थाबाट ऋण असुली तथा सम्पत्ति व्यवस्थापनबाट प्राप्त रकमकै आधारमा बचतकर्तालाई भुक्तानी भइरहेको स्पष्ट पारेको छ।
समस्याग्रस्त सहकारी व्यवस्थापन समितिले प्रचलित कानुनी व्यवस्थाअनुसार समस्याग्रस्त घोषित सहकारीहरूको ऋण असुली र सम्पत्ति व्यवस्थापनलाई निरन्तर अघि बढाउँदै त्यसबाट प्राप्त रकम सम्बन्धित सहकारीका बचतकर्तालाई फिर्ता गर्ने प्रक्रिया जारी रहेको जनाएको छ।
