रातभरको खोजीपछि दुई वर्षीया बालिका सकुशल फेला
बारा । कलैया उपमहानगरपालिका–१ कटि पर्सा टोलबाट हराएकी दुई वर्षीया बालिका रातभरको खोजीपछि सकुशल फेला परेकी छन्।
कलैया उपमहानगरपालिका–१ कटि पर्सा टोल निवासी मुकेशकुमार मण्डलकी करिब दुई वर्षीया छोरी बिन्दी कुमारी मण्डल शनिबार साँझ करिब ५ः३० बजे घर अगाडिबाट हराएकी थिइन्।
बालिका हराएको जानकारी उनका हजुरबुवा मदन मण्डलले राति ८ः४५ बजे अस्थायी प्रहरी पोस्ट बसपार्क, बारामा गराएपछि प्रहरीले तत्काल खोजतलास सुरु गरेको थियो।
बालिकाको खोजीका लागि रातभर विभिन्न समूहमा प्रहरी टोली परिचालन गरिएको थियो। प्रहरीले कुकुरसहितको टोलीसमेत परिचालन गरी आसपासका क्षेत्रमा खोजी गरेको थियो।
खोजीका क्रममा आइतबार बिहान करिब ५ः४५ बजे कलैया उपमहानगरपालिका–२६ सिस्वास्थित बाटोबाट बालिकालाई सकुशल फेला पारिएको प्रहरीले जनाएको छ।
फेला परेकी बालिकालाई आइतबार बिहान ११ बजे उनका बुबा मुकेशकुमार मण्डल र हजुरआमा सावित्री मण्डलको जिम्मा लगाइएको छ।
