चितवनमा १६८ किलो गाँजा सहित दुई जना पक्राउ
चितवन । प्रहरीले चितवनको राप्ती नगरपालिकाबाट १६८ किलो लागूऔषध गाँजासहित दुई जनालाई पक्राउ गरेको छ।
जिल्ला प्रहरी कार्यालय चितवनका अनुसार २०८३ भदौ ८ गते बिहान करिब ३ः४० बजे राप्ती नगरपालिकाको भित्री सडक हुँदै पूर्व–पश्चिम राजमार्गतर्फ जाँदै गरेको कारमा गाँजा ओसारपसार भइरहेको भन्ने गोप्य सूचनाका आधारमा प्रहरी परिचालन गरिएको थियो।
प्रहरी टोलीले राप्ती नगरपालिका–१० स्थित चिप्लेटीमा उक्त कार रोकी जाँच गर्ने क्रममा चालक दिल्लीराम थारू र कारमा सवार कर्णबहादुर तामाङलाई नियन्त्रणमा लिएको हो।
कारको खानतलासी गर्दा पछाडिको डिक्कीभित्र रातो प्लास्टिकलाई सेतो पानी टेपले बेरेर लुकाइराखिएको अवस्थामा चारपाटे आकारका १२ वटा पोका फेला परेका थिए। ती पोकामा १६८ किलो गाँजा रहेको प्रहरीले जनाएको छ।
पक्राउ परेका दुवै जनालाई बरामद गाँजासहित चितवन जिल्ला अदालतमा उपस्थित गराई चार दिनको म्याद थप गरिएको छ। घटनाबारे थप अनुसन्धान भइरहेको जिल्ला प्रहरी कार्यालय चितवनले जनाएको छ।
