चोटमा परेका व्यक्तिले भगवानलाई त सराप्छ, सरकार र रास्वपा के हो ? :सभापति रवि लामिछाने
काठमाडौं । राष्ट्रिय स्वतन्त्र पार्टी (रास्वपा) का सभापति रवि लामिछानेले शोक र पीडाको अवस्थामा नागरिकबाट राज्यप्रति व्यक्त हुने आक्रोशलाई स्वाभाविक रूपमा लिनुपर्ने बताएका छन् ।
बुधबार प्रतिनिधिसभाको बैठकमा सम्बोधन गर्दै लामिछानेले नागरिकको आक्रोशलाई प्रहारका रूपमा नलिन राज्य संयन्त्र र पार्टी पंक्तिलाई आग्रह गरे ।
उनले आशा निराशामा परिणत हुँदा उत्पन्न हुने आक्रोश नागरिकको स्वाभाविक अधिकार भएको बताए । गहिरो पीडा र अप्रत्याशित शोकमा रहेका नागरिकले आफ्नै विश्वासमाथि प्रश्न उठाउने अवस्था आउने भन्दै उनले राज्य र राजनीतिक दलप्रति आक्रोश व्यक्त हुनु अस्वाभाविक नभएको बताए ।
‘जब मानिस गहिरो चोटमा पर्छ, उसले अप्रत्याशित शोक भोग्छ । उसले भगवानलाई त सराप्छ भने यो सरकार के हो ? रास्वपा के हो ?’ लामिछानेले भने ।
नागरिकले व्यक्त गरेको आक्रोशलाई आफूहरूमाथिको आक्रमणका रूपमा बुझ्न नहुने उनको भनाइ छ । बरु त्यसलाई नागरिकको अपेक्षा र संकटका बेला राज्यसँग गरिएको अन्तिम गुहारका रूपमा बुझ्नुपर्ने उनले बताए ।
‘नागरिकको त्यो आक्रोशलाई हामीले हाम्रो विरुद्धको प्रहार होइन, हामीप्रतिको अपेक्षा र राज्य गुहार्ने अन्तिम चित्कारको रूपमा बुझ्नुपर्छ,’ उनले भने ।
लामिछानेले नागरिकको पीडा र आक्रोश सुन्ने, सहने तथा उनीहरूको आँसु पुछ्ने क्षमता नै राज्यसत्ताको वास्तविक परीक्षा भएको बताए ।
‘त्यो आक्रोश सुन्ने, सहने र उनीहरूको आँशु पुछ्ने फराकिलो छाती नै आजको साँचो राज्यसत्ता हो,’ उनले भने ।
