झापा र सुनसरीबाट १० लाखभन्दा बढीको भन्सार छलीको सामान बरामद
विराटनगर । झापा र सुनसरीका छुट्टाछुट्टै स्थानबाट प्रहरीले भन्सार छली गरी ल्याइएका १० लाख रुपैयाँभन्दा बढी मूल्यका अवैध सामान बरामद गरेको छ।
भदौ २५ गते गोप्य सूचनाका आधारमा जिल्ला प्रहरी कार्यालय झापाबाट खटिएको टोलीले शिवसताक्षी नगरपालिका–१० फाल्गुनन्द चोकबाट प्रदेश ३–०१–०२३ च २४७५ नम्बरको मारुती कार्गो (इको) भ्यानसहित विभिन्न प्रकारका कपडा बरामद गरेको हो।
प्रहरीका अनुसार बरामद सामानको मूल्य ९ लाख २९ हजार १ सय रुपैयाँ रहेको छ। प्रहरीले भ्यान चालक भद्रपुर नगरपालिका–५ का ३० वर्षीय राकेश लिम्बूलाई नियन्त्रणमा लिएको छ। बरामद सामान र चालकलाई आवश्यक कारबाहीका लागि मेची भन्सार कार्यालयमा बुझाइएको प्रहरीले जनाएको छ।
यस्तै, इलाका प्रहरी कार्यालय दुहबी र इलाका प्रहरी कार्यालय सीतागञ्ज, सुनसरीबाट खटिएको प्रहरी टोलीले बर्जु गाउँपालिका–२ बाट भन्सार छली गरी ल्याइएको कुर्ता–सुरुवाललगायतका सामान बरामद गरेको छ।
प्रहरीका अनुसार प्र.१–०४–००१ प ९३३२ नम्बरको मोटरसाइकलमा ल्याइएको उक्त सामानको मूल्य १ लाख ३२ हजार रुपैयाँ बराबर रहेको छ।
दुवै स्थानबाट बरामद सामानको कुल मूल्य १० लाख ६१ हजार १ सय रुपैयाँ रहेको प्रहरीले जनाएको छ।
