विराटनगरबाट तास खेलिरहेको अवस्थामा ८ जना पक्राउ
विराटनगर, असोज १३ गते । मोरङको विराटनगर महानगरपालिका–६ सरौचियाबाट प्रहरीले तास खेलिरहेको अवस्थामा ८ जनालाई पक्राउ गरेको छ।
जिल्ला प्रहरी कार्यालय मोरङबाट खटिएको प्रहरी टोलीले स्थानीय लालु पासवानको घरमा तास खेलिरहेको अवस्थामा उनीहरूलाई पक्राउ गरेको हो। प्रहरीले उनीहरूको साथबाट १ बुङ्ग तास र नगद ४८ हजार ३९५ रुपैयाँ बरामद गरेको जनाएको छ।
पक्राउ पर्नेमा विराटनगर–६ का राजेश कामत, गंगाराम मण्डल र विष्णु कामत, विराटनगर–४ का सत्यनारायण राजवंशी र तोरण यादव, विराटनगर–८ का चन्दन मुखिया, विराटनगर–१४ का बलराम कोइराला तथा धनपालथान गाउँपालिका–६ का साजन राजवंशी रहेका छन्।
पक्राउ परेका उनीहरूमाथि आवश्यक कानुनी कारबाही अघि बढाइएको प्रहरीले जनाएको छ।
