उच्च अदालत विराटनगर धनकुटा इजलासमा बार–बेञ्च बैठक सम्पन्न
धनकुटा,१४ असोज । उच्च अदालत विराटनगरको धनकुटा इजलासमा बार र बेञ्चबीच समन्वय तथा सहकार्यसम्बन्धी बैठक सम्पन्न भएको छ।
आज उच्च अदालत विराटनगर धनकुटा इजलास र अदालत बार एसोसिएसन धनकुटाको आयोजनामा बैठक सम्पन्न भएको हो।
इजलासका मुख्य न्यायाधीश कृष्णलाल भट्टराईको अध्यक्षतामा भएको कार्यक्रममा न्यायाधीश टंकप्रसाद गुरुङको उपस्थिति रहेको थियो। कार्यक्रममा रजिस्ट्रार शोभाकर खरेलले सहभागीलाई स्वागत गरेका थिए।
बैठकमा अदालत बार एसोसिएसन धनकुटाका अध्यक्ष, पदाधिकारी, वरिष्ठ अधिवक्ता तथा अधिवक्ताहरूको सहभागिता रहेको थियो। सहभागीहरूले न्याय सम्पादनलाई प्रभावकारी बनाउने विषयमा आ–आफ्ना सुझाव तथा धारणा राखेका थिए।
बार र बेञ्चबीच समन्वय, सहकार्य र आपसी समझदारी थप अभिवृद्धि गर्दै न्याय सम्पादनलाई प्रभावकारी, गुणस्तरीय, छिटोछरितो तथा सेवाग्राहीमैत्री बनाउने प्रतिबद्धता जनाउँदै बैठक सम्पन्न भएको जनाइएको छ।
