सुनसरीमा २ हजार ५६६ किलो गाँजा सहित ट्रक नियन्त्रणमा, ट्रकका चालक र सहचालक पक्राउ
सुनसरी । सुनसरीको इनरुवाबाट प्रहरीले २ हजार ५६६ किलोभन्दा बढी गाँजासहित ट्रक नियन्त्रणमा लिएको छ। प्रहरीले ट्रकका चालक र सहचालकलाई समेत पक्राउ गरेको छ।
जिल्ला प्रहरी कार्यालय सुनसरीका अनुसार असोज १८ गते राति करिब ११ः५० बजे इनरुवा नगरपालिका–३ सखुवागाछी चोकमा खटिएको प्रहरी टोलीले पूर्वबाट पश्चिमतर्फ जाँदै गरेको ना.७ ख १८२५ नम्बरको ट्रकलाई शंका लागेर रोकी जाँच गरेको थियो।
ट्रकमा बन्दागोपीले छोपेर राखिएको अवस्थामा ८३ बोरा गाँजाजस्तो देखिने पदार्थ फेला परेको थियो। तौल गर्दा उक्त पदार्थको कुल तौल २ हजार ५६६ किलो ५६० ग्राम रहेको प्रहरीले जनाएको छ।
घटनामा धनकुटाको शहिदभूमि गाउँपालिका–२ का ३३ वर्षीय ट्रक चालक राजु राई र १८ वर्षीय सन्दिप राईलाई नियन्त्रणमा लिइएको छ।
गाँजा र ट्रकसहित पक्राउ परेका दुवै जनालाई जिल्ला प्रहरी कार्यालय सुनसरीमा ल्याई घटनाबारे थप अनुसन्धान भइरहेको प्रहरीले जनाएको छ।
