धनकुटाको पाख्रीबासमा आज चार घण्टा विद्युत् सेवा अवरुद्ध हुने
धनकुटा,२७ असोज । धनकुटाको पाख्रीबास नगरपालिकाका सम्पूर्ण स्थानमा आज मंगलबार विद्युत् सेवा अवरुद्ध हुने भएको छ ।
नेपाल विद्युत् प्राधिकरण धनकुटा वितरण केन्द्रका अनुसार आज दिउंसो १ बजेदेखि साँझ ५ बजेसम्म पाख्रीबास फिडरअन्तर्गत हिलेदेखि पाख्रीबाससम्मको ११ केभी विद्युत् लाइनमा मर्मत तथा सुधारको काम गरिने भएकाले विद्युत् सेवा अवरुद्ध हुने भएको हो ।
उक्त अवधिमा विद्युत् लाइन वरिपरिका रूखका हाँगा, बाँस तथा झाडी कटान (बुस कटिङ), डिस्क र पिन परिवर्तन तथा जम्पर कस्ने कार्य गरिने प्राधिकरणले जनाएको छ ।
निर्धारित समयअघि नै काम सम्पन्न भएमा विद्युत् सेवा सोहीअनुसार चाँडै सुचारु गरिने धनकुटा वितरण केन्द्रले जनाएको छ ।
विद्युत् सेवा अवरुद्ध हुँदा ग्राहकमा पर्न जाने असुविधाप्रति प्राधिकरणले क्षमायाचना गरेको छ ।
