सुनसरीमा भन्सार छलीका ९८ हजार रुपैयाँका सामान बरामद
सुनसरी । सुनसरीको देवानगञ्ज गाउँपालिकाबाट प्रहरीले भन्सार छली गरी ल्याइँदै गरेका करिब ९८ हजार रुपैयाँ बराबरका इलेक्ट्रोनिक्स तथा भान्साका सामान बरामद गरेको छ।
जिल्ला प्रहरी कार्यालय सुनसरीका अनुसार आज बिहान करिब ९ बजे देवानगञ्ज गाउँपालिका–७ स्थित हुलाकी राजमार्गमा इलाका प्रहरी कार्यालय हरिनगराबाट खटिएको प्रहरी टोलीले उक्त सामान बरामद गरेको हो।
भारतबाट नेपालतर्फ आउँदै गरेको नम्बर नखुलेको मोटरसाइकलमा सवार व्यक्तिले प्रहरीलाई देखेपछि भन्सार छली गरी ल्याउँदै गरेका सामान फालेर मोटरसाइकलसहित फरार भएको प्रहरीले जनाएको छ।
बरामद गरिएका सामान आवश्यक कारबाहीका लागि इलाका प्रहरी कार्यालय हरिनगरामा राखिएको छ। फरार मोटरसाइकल चालकको पहिचान तथा खोजी भइरहेको जिल्ला प्रहरी कार्यालय सुनसरीले जनाएको छ।
