धरानको वातावरणीय समस्या उजागर गर्दै युवा फोटो पत्रकार रेन याक्थुङ्बा
हिराराज राई, धनकुटा । सुनसरीको धरान उपमहानगरपालिका-८ निवासी युवा फोटो पत्रकार रेन याक्थुङ्बा दृश्य पत्रकारितामार्फत जनसरोकारका विषय उजागर गर्न सक्रिय छन्। तस्बिर र भिडियो केवल दृश्य अभिलेखका माध्यम मात्र नभई समाजका यथार्थ उजागर गर्ने र सार्वजनिक बहस सिर्जना गर्ने प्रभावकारी माध्यम भएको विश्वासका साथ उनले स्थानीय समुदायका समस्या र नागरिकका आवाजलाई प्राथमिकताका साथ प्रस्तुत गर्दै आएका छन्।
नेपाल फोटो पत्रकार महासंघ सुनसरीका सक्रिय सदस्यसमेत रहेका याक्थुङ्बाले वातावरणीय प्रदूषण, फोहोर व्यवस्थापन, विपद् तथा सार्वजनिक सरोकारका विषयमा तस्बिर र भिडियो पत्रकारितामार्फत निरन्तर सामग्री तयार गर्दै आएका छन्। उनका दृश्य सामग्रीले घटनाको दृश्य मात्र नभई त्यसले समाज र नागरिकको जीवनमा पार्ने प्रभावसमेत उजागर गर्ने प्रयास गरेको देखिन्छ।
विशेषगरी धरानको डम्पिङ साइटमा फोहोर जलाउँदा उत्पन्न हुने वातावरणीय समस्यालाई उनले दृश्य पत्रकारितामार्फत प्रभावकारी रूपमा सार्वजनिक गरेका छन्। उनका अनुसार डम्पिङ साइटबाट निस्कने धुवाँ करिब ४–५ किलोमिटरसम्म फैलिने गरेको छ। दिउँसै बाक्लो धुवाँका कारण सडक कुहिरोले ढाकेजस्तै देखिने अवस्था सिर्जना हुने गरेको उनले बताएका छन्। यसले मानव स्वास्थ्य, वन्यजन्तु तथा समग्र वातावरणमा गम्भीर असर पार्न सक्ने भएकाले समस्याको दीर्घकालीन समाधानका लागि सम्बन्धित निकायले तत्काल ध्यान दिनुपर्ने उनको भनाइ छ।
दृश्य पत्रकारिताको मुख्य शक्ति भनेकै एउटा प्रभावशाली तस्बिर वा भिडियोले लामो विवरण व्यक्त गर्न नसक्ने यथार्थलाई समेत सहज, स्पष्ट र विश्वसनीय ढङ्गले प्रस्तुत गर्न सक्नु हो। यही कारण फोटो तथा भिडियो समाचारले आम नागरिकलाई घटनाको वास्तविक अवस्था बुझाउन महत्त्वपूर्ण भूमिका खेल्ने गरेको छ।
स्थानीय समुदायका समस्या, सार्वजनिक सेवा, वातावरणीय प्रदूषण तथा विपद् व्यवस्थापनजस्ता विषयलाई निरन्तर प्राथमिकतामा राख्दै दृश्य पत्रकारितामार्फत समाजका आवाज उठाइरहेका याक्थुङ्बाको सक्रियताले फोटो पत्रकारिताको सामाजिक उत्तरदायित्वलाई थप सशक्त बनाएको छ।
